یہ صفحہ دوست کو ای میل کیجیئے		پرِنٹ کریں

مصر کا روایتی رقص

مصر کی عدالت نے اس فیصلے کو برقرار رکھا ہے جس میں غیر ملکیوں پر مصر میں بیلی ڈانس کے رقص کرنے پر پاندی لگائی گئی تھی۔

عدالت نے اس فیصلے کے خلاف روسی اور آسٹریلوی رقاصاؤں کی اس اپیل کو رد کرتے ہوئے کہا کہ مصر کی وزارت افرادی قوت کو اس فیصلے کا پورا حق تھا۔

قاہرہ میں کونسل آف سٹیٹ کی عدالت نے کہا کہ قانون کے مطابق وزارت کو حق ہے کہ وہ مخصوص پیشوں میں غیر ملکیوں کے کام کرنے پر پابندی لگا سکے۔

مصر میں بیلی ڈانس کی غیر ملکی رقاصاؤں پر پابندی یکم جنوری سے عمل میں آئی ہے۔

بیلی ڈانس کرنے والی اول درجے کی رقاصاؤں کو ایک رات میں ساڑھے تین ہزار ڈالر تک مل سکتے ہیں۔

حالیہ برسوں میں غیر ملکی رقاصاؤں کی بہت بڑی تعداد مصر میں کام کے غرض سے آئی ہے۔ ایک اندازے کے مطابق ملک میں کام کرنے والی بیلی ڈانسرز میں سے غیر ملکیوں کی تعداد ایک تہائی تک پہنچ چکی تھی۔

مصر کے نائٹ کلب کے مالکان اس فیصلے سے زیادہ خوش نہیں ہیں۔ ایک نائٹ کلب کے مینیجر نے امریکی روزنامہ ’دی نیو یارک ٹائمز‘ کو بتایا کہ غیر ملکی خواتین بہت محنت کرتی تھیں اور وہ پرانی مصری فلموں سے رقص کے مختلف انداز سیکھ کر اپنی پرفارمنس میں شامل کرنے کی کوشش کرتی تھیں۔ ان کا کہنا تھا کہ مصری رقاصاؤں کا خیال ہے کہ کیونکہ وہ مصری ہیں لہذا ان کو بیلی ڈانس کا سب کچھ آتا ہے اور کچھ سیکھنے یا اپنانے کی ضرورت ہی نہیں۔

کچھ مصریوں کا خیال ہے کہ یہ رقص صرف مصری ہی صحیح معنوں میں کر سکتے ہیں۔

لیکن مسئلہ یہ ہے کہ اپنی اس ثقافتی روایت کو برقرار رکھنے کی خواہش کے باوجوں بہت کم مصری یہ چاہیں گے کہ ان کی اپنی بیٹیاں یہ پیشہ اپنائیں۔