تیل کی قیمتیں گزشتہ چار ماہ میں پچیس فیصد بڑھ چکی ہیں اور سن دو ہزار ایک کے بعد ان میں چار سو فیصد اضافہ ہوا ہے

تیل کی قیمت دو سو ڈالر فی بیرل تک پہنچنے کی تنبیہ گولڈمین سیکسس کے ارگن مرتی نے کی۔ انہوں نے کہا کہ تیل کی بڑھتی ہوئی مانگ کے باعث امکان بڑھ رہا ہے کہ چھ ماہ سے دو سال کے اندر تیل کی قیمت دو سو ڈالر ہو سکتی ہے۔

مسٹر مرتی نے اس سے پہلے تین سال قبل جب تیل کی قیمت پچپن ڈالر تھی پیشنگوئی کی تھی کہ یہ بڑھ کر ایک سو ڈالر سے زیادہ ہو جائے گی اور اس سال جنوری میں ان کی بات درست ثابت ہوئی۔

تیل کی قیمتیں گزشتہ چار ماہ میں پچیس فیصد بڑھ چکی ہیں اور سن دو ہزار ایک کے بعد ان میں چار سو فیصد اضافہ ہوا ہے۔

تیل کی بڑھتی ہوئی مانگ کی بڑی وجہ چین کی اقتصادی ترقی ہے اور کسی حد تک انڈیا کی ترقی کا بھی اس میں ہاتھ ہے۔ تیل کی مانگ میں اس وقت اضافہ ہوا ہے جب تیل پیدا کرنے والے کئی ممالک کو تیل کی پیداوار میں مسائل کا سامنا ہے۔

نائجیریا میں حکومت کے مخالفین کی طرف سے تیل کی پائپوں پر حملوں کی وجہ سے پیداوار گر چکی ہے جبکہ عراق کو ترکی کی فوجوں کے کردوں پر حملوں کی وجہ سے ترسیل میں مشکلات کا سامنا ہے۔ امریکہ میں موسم گرما میں لوگ گاڑیوں پر زیادہ سفر کرتے ہیں جس سے مانگ بڑھ جاتی ہے۔