یورو اور دیگر کرنسیوں کے مقابلے ڈالر کی قدر میں مزید کمی ہوئی ہے

تجزیہ نگاروں کا کہنا ہے کہ اِس کی وجہ تیل کی فراہمی میں کمی نہیں ہے بلکہ امریکی معیشت کے بارے میں تشویش اور ڈالر کی گرتی ہوئی ساکھ کی وجہ سے سرمایہ کار اب تیل اور دیگر اجناس میں سرمایہ کاری کررہے ہیں۔

ادھر یورو کی قدر میں بھی ڈالر کے مقابلے میں ریکارڈ اضافہ ہوا ہے اور پہلی مرتبہ ڈالر کے مقابلے میں یورو کی قدر 1.55 ڈالر ہوگئی ہے۔

ماہرین کہتے ہیں کہ ڈالر کی گرتی ہوئی قدر کی وجہ سے بھی تیل کی قیمت میں اضافہ ہوا ہے

صدر جارج بش نے کہا ہے کہ وہ چاہتے ہیں کہ ڈالر مضبوط ہو اور انہیں اس بات پر تشویش ہے کہ ڈالر کی قدر میں کمی سے بھی تیل کی قیمتوں میں اضافہ ہو رہا ہے۔

انہوں نے کہا کہ ڈالر کے مضبوط کرنسی بننے کا ایک سبب یہ ہے کہ اس سے افراطِ زر سے نمٹنے میں مدد ملتی ہے۔ ’اب ہمارا ڈالر تیل کے اتنے بیرل نہیں خریدتا جتنا کہ یہ خریدا کرتا تھا لہذا تیل اب امریکی عوام کے لیے اور مہنگا ہو گیا ہے۔‘

گزشتہ ہفتے جب تیل کی قیمت ایک سو سات ڈالر فی بیرل تک پہنچ گئی تھی تو وائٹ ہاؤس نے کہا تھا کہ قیمتوں میں کمی کے لیے وہ تیل پیدا اور برآمد کرنے والے ممالک کی تنظیم اوپیک سے کہے گا کہ تیل کی پیداوار میں اضافہ کیا جائے۔

تیل کی قیمتوں میں اضافے کا ایک سبب چین میں بڑھتی ہوئی طلب کے باوجود گزشتہ ہفتے اوپیک کے ممالک کا پیداوار میں تبدیلی نہ لانے کا فیصلہ تھا۔