باراک اوباما کا کہنا ہے کہ سیاہ فام ہونا انتخابی دوڑ میں فائدہ مند نہیں ہے

مشیر جیرلڈین فیرارو نے کہا تھا کہ اگر باراک اوبامہ سیاہ فام نہ ہوتے وہ وائٹ ہاؤس کی اس دوڑ میں آگے نہ ہوتے۔ فیرارو انیس سو چوراسی میں نائب صدر کےعہدے کی امیدوار بھی تھیں اور آج کل ہیلری کلنٹن کے لیے ایک مالیاتی کمیٹی میں اعزازی طور پر کام کر رہی تھیں۔

اس سے قبل انہوں نے امریکی ٹی وی چینل اے بی سی سے بات کرتے ہوئے کہا تھا کہ باراک اوباما کے کیمپ نے ان کے جملے کو نسل پرستی کا رنگ پہنا دیا ہے۔

خود باراک اوبامہ نے اس خیال کو مسترد کر دیا تھا کہ ان کا سیاہ فام ہونا کسی بھی طرح الیکشن میں فائدہ مند ہے۔

ہیلری کلنٹن نے اپنے آپ کو ان تبصروں سے پرے رکھا ہے۔

یہ معاملہ اس وقت زیادہ شدت اختیار کر گیا جب منگل کو مِسی سِپی میں ووٹنگ ہو رہی تھی۔ باراک اوبامہ نے اس مقابلے میں ہیلری کلنٹن پر واضح برتری حاصل کر لی تھی۔

بدھ کو کلنٹن کیمپ کی طرف سے یہ تصدیق کی گئی کہ فیرارو اپنے اعزازی عہدے سے علیحدہ ہو گئی ہیں۔

یہ تنازعہ اس وقت شروع ہوا جب فیرارو نے کیلیفورنیا کے ایک اخبار کو انٹرویو دیتے ہوئے بظاہر اس طرح کی بات کی کہ باراک اوباما کی کامیابی میں ان کی نسل کو دخل ہے۔ فیرارو کے حوالے سے کہا گیا کہ ’اگر باراک اوبامہ سفید فام ہوتے تو اس طرح کی (بہتر) پوزیشن میں نہ ہوتے۔‘

لیکن فیرارو نے ٹی وی شوز میں یہ کہا کہ ان کی بات کی تشریح علط انداز میں کی گئی ہے کیونکہ انہوں نے ہمیشہ ہر طرح کے امتیاز کی مخالفت کی ہے۔ انہوں نے ایک اور انٹرویو میں کہا کہ ان کے پہلے انٹرویو کو سیاق و سباق سے ہٹ کر نشر کیا گیا ہے اور اوبامہ کیمپ نے انہیں نسل پرستی کا لباس پہنا دیا ہے۔