ہیلری کلنٹن نے انتخابی جائزوں کو غلط کر دکھایا

انتخابات: ہیلری کلِنٹن کی واپسی

نیو ہیمپشائر میں انتخابی جنگ

ہیلری کلنٹن نے انتالیس فیصد جبکہ سینیٹر باراک اوباما نے چھتیس فیصد ووٹ لیے۔ فتح کے بعد اپنے حامیوں سے خطاب کرتے ہوئے ہیلری کلنٹن نے کہا کہ’میں خصوصی طور پر نیو ہیمپشائر کا شکریہ ادا کرنا چاہتی ہوں۔

’گزشتہ ایک ہفتے کے دوران میں نے آپ لوگوں کو سنا اور اس دوران میں نے خود کو بھی تلاش کر لیا۔ مجھے لگا کہ ہم سب اپنے دل کی بات کہہ رہے ہیں اور میں بہت شکر گزار ہوں کہ آپ نے میری پکار پر لبیک کہا۔‘

دلچسپ امر یہ ہے کہ سولہ برس قبل اسی ریاست میں ہیلری کلنٹن کے شوہر اور سابق امریکی صدر بل کلنٹن نے فتح حاصل کر کے ڈیموکریٹ صدارتی امیدوار بننے کی بنیاد رکھی تھی۔

دوسرے نمبر پر آنے والے سینیٹر باراک اوبامہ نے اپنی شکست تسلیم کرتے ہوئے کہا ہے کہ وہ ملک میں تبدیلی کے لیے کام کرتے رہیں گے۔ واضح رہے کہ نیو ہیمپشائر میں ووٹنگ سے قبل لیے جانے والے انتخابی جائزوں کے مطابق باراک اوبامہ کو یہاں واضح برتری حاصل تھی۔

	عوامی جائزوں کے مطابق بھی جان مکین کو سبقت حاصل تھی

نیوہیمشائر میں پرائمریز میں ووٹنگ کا آغاز روایتی طور پر ڈکسوائل نوچ اور ہارٹ لوکیشن کے دو چھوٹے چھوٹے قصبوں سے ہوا اور ریاست کے سیکرٹری بل گارڈنر کا کہنا ہے کہ اس مرتبہ ریکارڈ شرحِ ووٹنگ رہی ہے اور قریباً پانچ لاکھ افراد نے ووٹ ڈالا ہے۔

فتح کے بعد اپنے مرکز پر حامیوں سے بات کرتے ہوئے ریپبلکن رہنما جان مکین نے کہا کہ’ آج کی رات ہم نے انہیں دکھا دیا ہے کہ واپسی کسے کہتے ہیں‘۔ مٹ رومنی نے بھی جان مکین کو کامیابی پر مبارکباد دی اور کہا ’آج ایک اور نقرئی تمغہ، میں طلائی تمغہ جیتنا چاہتا تھا مگر مجھے دوسرا مقام ہی ملا۔ سینیٹر جان مکین قابلِ تعریف ہیں۔‘