آئیوا میں حاصل ہونے والی کامیابی دونوں امیدوار کو آگے چل کر بہت فائدہ دے گی

آئیوا میں ڈیموکریٹ اور رپبلکن پارٹی کے صدارتی امیدوار نامزد کرنے کے لیے دنوں جماعتوں کے اراکین کے اجتماعات ہوئے۔

ڈیموکریٹ پارٹی کے کاکسز یا اجتماعات میں اوبامہ نے ہیلری کلنٹن اور جان ایڈورڈ پر ایک سخت مقابلے کے بعد برتری حاصل کر لی۔ جبکہ مائیک ہکابی نے رپبلکن پارٹی کے اجلاسوں میں مٹ رومنی کو ہرا دیا۔

آئیوا میں حاصل ہونے والی برتری ان دونوں امیدوارں کے لیے آگے چل کر بہت فائدہ مند ثابت ہو سکتی ہے۔ ان جماعتوں کے اندر صدارتی امیدوار کی نامزدگی کا اگلا مقابلہ اب منگل کو نیو ہیمپشائر کی ریاست میں ہوگا۔

رپبلکن اراکین کے ایک ہزار سات سو اسی اجتماعات میں سے اسی فیصد اجمتاعات کے نتائج کے مطابق ہکابی نے چونتیس فیصد ووٹ حاصل کیے۔ ہکابی ماضی میں ارکنساس کے گورنر رہ چکے ہیں۔ان کے مد مقابل رومنی پچیس فیصد اراکین کی حمایت حاصل کر سکے۔

ہکابی کی کامیابی کو رومنی کے لیے ایک شدید دھچکا قرار دیا جا رہا ہے کیونکہ انہوں نے ہکابی کے مقابلے میں اپنی انتخابی مہم پر دسویوں لاکھ ڈالر زیادہ خرچ کیے ہیں۔تاہم رومنی نے کہا کہ رپبلکن پارٹی کی نامزدگی کے لیے ان کا مقابلہ ابھی ختم نہیں ہوا ہے۔

انہوں نے ایک امریکی ٹی وی چینل کو انٹرویو دیتے ہوئے کہا کہ صدراتی امیدوار کی نامزدگی کا یہ مقابلہ بیس بال کے کھیل کی طرح ہے اور ابھی پہلی اننگز ہوئی ہے۔ انہوں نےکہا کہ یہ پچاس اننگز کا مقابلہ ہے اور وہ ہار نہیں مانیں گے اس امید کے ساتھ کہ جب یہ ختم ہوگا تو جیت ان ہی کے نام ہو گی۔

ڈیموکریٹ پارٹی کے اجتماعات میں اوبامہ نے اڑتیس فیصد ووٹ حاصل کیے جبکہ ان کے مدمقابل امیدواروں ہیلری کلنٹن اور ایڈورڈ نے بالترتیب انتیس اور تیس فیصد ووٹ حاصل کیے۔

باراک اوبامہ کی انتخابی حکمت عملی تیار کرنے والے ڈیوڈ ایکسلراڈ نے کہا کہ ان کے خیال میں لوگ تبدیلی کو ترس رہے ہیں۔

باراک اوبامہ امریکہ کے پہلے سیاہ فام صدر ہونے کا اعزاز حاصل کرنےکے لیے کوشاں ہیں۔ آئیوا کے اجتماعات کے بعد ہیلری کلنٹن اور ایڈورڈ نے جدوجہد جاری رکھنے کا عزم کیا۔

دونوں جماعتوں کے یہ اجتماعات جن میں ان پارٹیوں کے صدارتی امیدوار کی نامزدگی کا فیصلہ ہو گا امریکی کی تمام ریاستوں میں ہوں گے۔