اسرائیلی فوجی پکڑے گئے فلسطینیوں کی آنکھوں پر پٹی باندھ رہا ہے

اراکات نے کہا کہ امن کا حصول اس وقت تک ناممکن ہے جب تک ’اسرائیل کی طرف سے کارروائیاں اور آبادکاری کا عمل رک نہیں جاتا‘۔ انہوں نے کہا کہ فلسطینی رہنما محمود عباس منگل کو اسرائیلی وزیر اعظم کے ساتھ ملاقات میں یہ حملے روکنے کا مطالبہ کریں گے۔

ان کا یہ بیان اسرائیلی وزیر اعظم ایہود اولمرت کے اس بیان کے چند گھنٹوں کے بعد دیا گیا جس میں انہوں غزہ میں ’شدت پسندوں‘ کے خلاف حملے تیز کرنے کی دھمکی دی تھی۔

غزہ میں ’شدت پسندوں‘ کی طرف سے حال ہی میں داغے جانے والے کچھ راکٹ اسرائیل کی حدود کے پندرہ کلومیٹر اندر گرے ہیں۔

اسرائیلی فوج نے غزہ میں اتوار کو کارروائی بھی کی جس میں ایک خاتون اور دو نوجوانوں سمیت چار افراد ہلاک ہوئے۔

اسرائیلی فوج کے ایک ترجمان نے رائٹرز کو بتایا کہ ان کے فوجیوں نے کچھ مسلح افراد پر فائرنگ کی تھی۔

صدر بُش نے امید ظاہر کی تھی کہ جنوری دو ہزار نو میں ان کے امریکی صدر کے عہدے سے ہٹنے سے پہلے مشرق وسطیٰ میں امن کے قیام کا معاہدہ طے پا جائے گا۔ اتوار کو ایک اسرائیلی ٹی وی چینل کو انٹرویو دیتے ہوئے انہوں نے کہا کہ وہ ایسے کسی معاہدے کی پیشینگوئی نہیں کر سکتے۔