ہلاک ہونے والوں نے دہشتگردوں کے خلاف ایک کاروائی میں امریکی فوجیوں کی مدد کی تھی: پولیس

اگرچہ ابھی تک اطلاعات کی تصدیق نہیں ہو سکی ہے تاہم پولیس کے مطابق القاعدہ کے اس حملے میں کل بائیس افراد ہلاک ہوگئے ہیں اور پانچ خواتین کو اغوا کر لیا گیا ہے۔

یہ حملہ شمال مشرقی عراق کے شہر کنان میں ہوا جس میں مزاحمت کاروں نے مورٹر اور راکٹ ِگرینیڈوں کی مدد سے گھروں اور ایک مسجد پر بمباری کر کے ایک مقامی سنّی شیخ اور اُن کے چند بیٹوں کو ہلاک کر دیا۔

کہا جاتا ہے کہ ان لوگوں نے کچھ دن قبل دہشت گردوں کے خلاف ایک کاروائی میں امریکی اور عراقی فوجیوں کی مدد کی تھی۔ بتایا جاتاہے کہ حملہ آور بھی سنّی تھے۔ ہلاک ہونے والوں کے لواحقین کا کہنا ہے کہ دہشت گردوں نے جانے سے پہلے پانچ عورتوں کو بھی اغوا کیا۔

بعقوبہ پولیس کے سربراہ جنرل علی دلایان نےکہا کہ حملہ آوروں نےگھروں کو تباہ کر دیا جن میں خاندان کے تمام لوگ تھے۔ ان میں سے دوگھر ایک ہی خاندان کے تھے۔

اطلاعات کے مطابق پولیس نے ایک مقامی گروہ، جو کبھی القاعدہ کا حمائتی تھا، اُس کی مدد سے جوابی کاروائی کی اور دہشت گردوں کو مار بھگایا۔

جنرل دلایان نے مزید کہا کہ بائیس حملہ آور بعدازاں کنان سے دور اس جنوبی علاقہ میں پکڑے گئے جوعراق میں القاعدا کا گڑھ مانا جاتاہے۔

کچھ دن قبل ہی القاعدہ اور مخالف سنّی عرب گروہ ایک ساتھ عراقی اورامریکی فوجوں کے ساتھ لڑ رہے تھے۔ مگر اب یہ رجحان بدل رہا ہے کیونکہ دہشت گردوں کے سخت مذہبی رجحانات کی وجہ سے ان کے ماضی کے ساتھی اب اُن سے الگ ہو رہے ہیں۔

حالیہ بغاوت پہلے اس قسم کی کارروائیاں صوبہ انبار میں شروع ہوئی تھیں، جو کبھی سنّی مزاحمت کا مرکز تھا مگر اب یہ دیگر صوبوں تک پھل چکی ہیں۔