 | | | بم دھماکے کے بعد تلعفر میں کرفیو لگا دیا گیا ہے |
عراق میں پولیس کا کہنا ہے کہ شمالی علاقے تلعفر میں ہونے والے ایک ٹرک خودکش بم دھماکے میں کم از کم ستائیس افراد ہلاک ہو گئے ہیں۔ بم دھماکہ شیعہ اکثریتی آبادی والے علاقے میں ہوا ہے۔ اس حملے میں کئی افراد زخمی بھی بتائے جاتے ہیں۔ بہت سے افراد ملبے تلے دبے ہوئے ہیں، جس کے باعث ہلاکتوں میں اضافے کا خدشہ ظاہر کیا جا رہا ہے۔ پورے تلعفر میں کرفیو لگا دیا گیا ہے۔ عراق کے دیگر حصوں کی طرح اس علاقے میں بھی اتحادی فوج امن بحال کرنے کی کوششیں کر رہی ہے تاہم اس کے باوجود یہاں رواں سال بم دھماکوں اور فائرنگ کے متعدد واقعات رونما ہوئے ہیں۔ تلعفر کے پولیس کمانڈر بریگیڈئر جنرل رحیم الجبوری نے بتایا کہ حملہ آور دھماکہ خیز مواد سے بھرا ایک ٹرک چلا رہا تھا۔ دھماکہ خیز مواد ٹرک پر لدے تعمیراتی سامان کی ایک ہلکی سی تہہ کے نیچے چھپایا گیا تھا۔ عراق کی وزارت داخلہ کے مطابق 27 مارچ کو القاعدہ سے تعلق رکھنے والے مزاحمت کاروں نے دعوی کیا تھا کہ انہوں نے تلعفر کے ایک شیعہ علاقے میں ٹرک بم دھماکہ کرکے 152 افراد کو ہلاک جبکہ 347 کو زخمی کردیا تھا۔ اس کے بعد بظاہر جوابی کارروائی کرتے ہوئے کچھ شیعہ مسلح افراد نے فائرنگ کرکے سنی فرقے کے 70 افراد کو ہلاک کردیا تھا۔ | 
فلوجہ اور تلعفر میں پچیس ہلاک
