 | | | ٹونی بلیئر پر بطور برطانوی وزیر اعظم مشرق وسطیٰ مذاکرات پر اثرانداز نہ ہونے کا الزام ہے |
اسرائیل اور فلسطینیوں کے درمیان امن مذاکرات شروع کرنے کے لیے جمعرات کو پرتگال کے شہر لِزبن میں مشرقِ وسطیٰ کے لیے بڑی طاقتوں کے ایلچی ٹونی بلیئر کی سربراہی میں ایک میٹنگ ہورہی ہے۔ امریکہ، روس، یورپی یونین اور اقوام متحدہ نے سابق برطانوی وزیراعظم ٹونی بلیئر کو مشرقِ وسطیٰ مذاکرات کے لیے اپنا ایلچی مقرر کیا تھا اور ان کی سربراہی میں یہ پہلی میٹنگ ہے۔ مشرق وسطیٰ امن مذاکرات کے لیے ٹونی بلیئر کے اختیارات محدود ہیں اور فلسطینی اداروں کی نشو و نما اور معیشت کی ترقی ان کی اہم ذمہ داریاں ہیں۔ گزشتہ ماہ غزہ کی پٹی میں حماس کے کنٹرول کرنے کے بعد مشرق وسطیٰ کے معاملے پر چار بڑی طاقتوں یعنی کوارٹیٹ کی یہ پہلی میٹنگ ہے۔ مشرق وسطیٰ میں قیام امن کی نئی کوشش کے لیے امریکی صدر جارج بش کے حالیہ بیان کے بعد ٹونی بلیئر بطورِ ایلچی اپنی پہلی میٹنگ کررہے ہیں۔ اس بات کی امیدیں کی جارہی ہیں کہ ٹونی بلیئر امن کی جانب کچھ حقیقی پیش رفت کرسکیں گے۔ پرتگال میں ہونے والی اس میٹنگ میں اقوام متحدہ کے سیکرٹری جنرل بان کیمون، امریکی وزیر خارجہ کونڈولیزا رائس، یورپی یونین کی خارجہ پالیسی کے سربراہ ہیویئر سولانا اور روسی وزیر خارجہ سرگیئی لیوراں بھی شامل ہونگے۔ پرتگال نے اس ہفتے کہا تھا کہ لِسبن میں کوارٹیٹ کی اس میٹنگ سے مشرق وسطیٰ امن مذاکرات کو بڑھاوا ملنے کی امید ہے۔ ٹونی بلیئر کی بحیثیت ایلچی تقرری کا گزشتہ ماہ اسرائیل اور محمود عباس کی فلسطینی انتظامیہ نے خیرمقدم کیا تھا۔ محمود عباس کی الفتح صرف غرب اردن میں اقتدار میں ہے جبکہ غزہ کی پٹی میں حماس کا کنٹرول ہے۔ حماس نے کہا تھا کہ جنگِ عراق اور لبنان میں حزب اللہ پر اسرائیلی حملوں کے دوران اپنے موقف کی وجہ سے ٹونی بلیئر بطور برطانوی وزیراعظم مشرقِ وسطیٰ امن کی جانب ایماندار یا مددگار نہیں رہے۔ ادھر امریکی صدر جارج بش نے اس سال کے آخر میں مشرق وسطیٰ امن مذاکرات کے لیے ایک کانفرنس بلائی ہے جس میں امریکہ اور اسرائیل کے کئی پڑوسی ممالک شریک ہونگے۔ | 
الاباما فائرنگ میں دس ہلاک
