حماس کارکنوں نے الفتح کی پوزیشنوں پر قبضہ کرنا شروع کر دیا ہے

شہر میں حماس کے زیرِ انتظام چلنے والی مساجد سے ہونے والے اعلانات میں الفتح کے شدت پسندوں کو اپنی پوزیشنیں چھوڑنے کے لیے دو گھنٹے کا وقت دیا گیا ہے۔

خبر رساں ایجنسیوں کی اطلاعات کے مطابق حماس کے کارکنوں نے شمالی اور وسطی غزہ میں الفتح تنظیم کی پوزیشنوں پر قبضہ کرنا شروع کر دیا ہے۔ حماس کی جانب سے یہ تازہ قدم پیر کو گزشتہ چند ہفتوں کے دوران جنگ بندی کا ساتواں معاہدہ ٹوٹنے اور گزشتہ چوبیس گھنٹے میں سولہ افراد کی ہلاکت کے بعد اٹھایا گیا ہے۔

ادھر فلسطینی صدر اور الفتح کے سربراہ محمود عباس نے الزام لگایا ہے کہ حماس میں شامل کچھ عناصر بزورِ طاقت غزہ کا کنٹرول حاصل کرنا چاہتے ہیں۔ اپنے بیان میں محمود عباس نے کہا کہ حماس کے کچھ رہنما ’فلسطینی مجاز اداروں کے خلاف بغاوت کی منصوبہ بندی کر رہے ہیں‘۔

اس سے قبل منگل کی صبح فلسطینی وزیراعظم اسماعیل ہنیہ کے گھر کو نشانہ بنائے جانے کے بعد حماس کے ترجمان فوزی براہوم نے الفتح کے کارکنوں پر الزام لگایا تھا کہ وہ فلسطینی وزیراعظم کو قتل کرنا چاہتے ہیں۔ ان کا یہ بھی کہنا تھا کہ’ حملہ آور تمام حدیں عبور کر چکے ہیں اور حماس نے فیصلہ کیا ہے کہ وہ ان قاتلوں اور حملہ آوروں کو سزا دے گی اور اس حوالے سے کسی رحم کا مظاہرہ نہیں کیا جائے گا‘۔

یروشلم میں بی بی سی کے نمائندے ٹم فرینکس کا کہنا ہے کہ اس وقت غزہ کے زیاہد تر باسی اپنے گھروں میں قید باہر ہونے والی پر تشدد جھڑپوں کی آوازیں سن رہے ہیں۔ جھڑپیں شدید اور پرتشدد ہیں اور اب شہر میں چند ہی علاقے ایسے ہیں جو محفوظ ہیں اور ان جھڑپوں میں شدت پسندوں کے علاوہ عام شہری بھی نشانہ بن رہے ہیں۔