خدشہ تھا کہ موسم بہار کے ساتھ طالبان کی کارروائیوں میں اضافہ ہو گا

تفتیش کاروں کا کہنا ہے کہ صوبہ ہرات میں ہلاک ہونے والوں میں عورتیں اور بچے بھی شامل تھے۔ ہرات سے ان کے علاوہ بھی ہلاکتوں کی اطلاعات ہیں۔

’سو سے زیادہ طالبان ہلاک‘

افغانستان میں موجود غیر ملکی افواج پر اپنی کارروائیوں کے دوران عام شہریوں کو مارنے کے الزامات نئے نہیں ہیں۔ انہی الزامات کے جواب میں اس سال جنوری میں نیٹو افواج نے کہا تھا کہ گزشتہ سال کی سب سے بڑی غلطی عام شہریوں کی ہلاکت تھی اور یہ کہ وہ آئندہ صورتحال کو بہتر کرنے کی کوشش کریں گے۔

نامہ نگاروں کا کہنا ہے کہ زیادہ تر شہری خود کش بمباروں اور اس قسم کے دیگر حملوں میں ہلاک ہوئے ہیں۔

افغانستان میں کسی بھی کارروائی میں شہریوں کی سب سے زیادہ ہلاکتوں کی حالیہ تصدیق اس وقت ہوئی جب صوبائی حکام اور اقوام متحدہ کے نمائندوں نے بدھ کے روز صوبہ شنداد میں ان مقامات کا معائنہ کیا جہاں گزشتہ سنیچر اور اتوار کو لڑائی ہوئی تھی۔

اس قدرے پرامن صوبے میں ہونے والی یہ لڑائی علاقے میں ہونے والی کارروائیوں میں سب سے مہلک تھی جس کے متعلق امریکی قیادت میں لڑنے والی افواج کا کہنا تھا کہ انہوں نے جنگجوؤں کو زمین اور فضا سے نشانہ بنایا تھا۔ تاہم فوج کا کہنا تھا کہ اس لڑائی کے دوران ’معصوم افغانوں کو زخمی ہونے سے بچانے کے لیے ہر احتیاط برتی گئی تھی۔‘

لیکن صوبہ ہرات کے ترجمان کا کہنا تھا کہ افغان پولیس نے علاقے کے دورے کے بعد بتایا تھا کہ لڑائی میں اکاون عام لوگ مارے گئے تھے جن میں اٹھارہ عورتیں اور کئی بچے بھی شامل تھے۔ پولیس کے پاس اس سے کہیں زیادہ لوگوں کے زخمی ہونے کی بھی اطلاعات ہیں۔

افغان تفتیش کاروں کا کہنا تھا کہ ان حملوں میں تقریباً ایک سو مکانات تباہ ہوئے اور سینکڑوں گھرانے وہاں سے نقل مکانی کر گئے ہیں۔

افغانستان میں اقوام متحدہ کے مشن نے بھی اپنی ایک ٹیم علاقے میں بھیجی ہے۔ ادارے نے بی بی سی کو بتایا کہ انہیں بھی’مقامی لوگوں نے مصدقہ اطلاعات دی ہیں جن کے مطابق انچاس عام شہری ہلاک ہوئے ہیں۔‘

کابل میں غیر ملکی کمانڈروں سے بات کرتے ہوئے صدر حامد کرزئی نے اپنی خفگی کا اظہار کیا۔ صدر کے ایک ترجمان کے مطابق ’ صدر نے نیٹو اور اتحادی فوجوں کے کمانڈروں کو بتایا کہ معصوم شہریوں کے ہلاک ہونے سے افغانوں کی برداشت جواب دیتی جا رہی ہے۔‘

صدر نے مزید کہا: ’ عام شہریوں کی ہلاکتیں اور لوگوں کے گھروں کی اچانک تلاشی کے واقعات ناقال قبول حد تک بڑھ گئے ہیں اور افغان انہیں زیادہ دیر تک برداشت نہیں کریں گے۔‘

بعد ازاں صحافیوں سے بات کرتے ہوئے صدر کرزئی نے کہا کہ عام شہریوں کی ہلاکت کے نتائج برے ثابت ہوں گے۔’ یہ بوجھ بنتا جا رہا ہے اور ہم اس پر ناخوش ہیں۔ مجھے امید ہے کہ بین الاقوامی برادری ہماری متعلقہ وزارتوں کے ساتھ مل کر کوئی ایسا لائحہ عمل تلاش کرے گی جو شہریوں کی ہلاکتوں کے اس سلسلے کا خاتمہ ثابت ہو۔‘

اس دوران امریکی اتحادی افواج نے کہا ہے کہ ایک چوکی پر حملے میں پانچ جنگجو ہلاک ہو گئے ہیں۔