کالج کے خودکش حملے میں ہلاک ہونے والے زیادہ ترطلباء تھے

گزشتہ اتوار کو خودکش بمبار نے کالج کے داخلی دروازے کے قریب خود کو دھماکہ خیز مواد سے اڑادیا تھا۔ حملے میں پچپن افراد زخمی بھی ہوئے تھے۔

دھماکے کے چند گھنٹے بعد عراق میں شیعہ ملیشاء کے رہنما مقتدہ الصدر نے کہا تھا کہ بغداد میں امریکی تعاون سے جاری چھاپوں کی ناکامی لازمی تھی۔

انہوں نے کہا تھا کہ عام شہریوں کو مکمل طور پر حکومتی تحفظ فراہم کرنے تک سکیورٹی کا کوئی بھی پلان کارگر ثابت نہیں ہوگا۔

کالج آف ایڈمنسٹریشن اینڈ اکنامکس پر مقتدہ الصدر کے ملیشاء کو کنٹرول حاصل ہے ۔ حملے کے بعد انہوں نے امریکہ سے ایک بار پھرکہا تھا کہ وہ عراق سے اپنی فوج نکال لے۔

عراقی وزیر اعظم نوری المالکی نے سنیچر کو کہا تھا کہ سکیورٹی سے متعلق امریکی تعاون میں اضافےکی وجہ سے ملک میں فرقہ وارانہ ہلاکتوں میں کمی آئی ہے۔

حکومتی ٹیلی ویژن کے مطابق پیر کے روز وزارت تعمیرات میں ہونے والے ایک دھماکے میں دس افراد ہلاک ہوگئے ہیں۔

دھماکہ کے وقت عراق کے نائب صدر عادل عبدالمہدی وزارت کے اندر ایک اجلاس میں شریک تھے لیکن انکو کسی قسم کا نقصان نہیں پہنچا۔

اب تک یہ معلوم نہیں ہوسکا ہے کہ دھماکہ بم یا مارٹر گولے کے پھٹنےکے نتیجےمیں پیش آیا ہے۔

خبر رساں ایجنسی اے ایف پی نے وزیر تعلیم عابد دیاب کے حوالے سے کہا تھا کہ گزشتہ پیر کے خودکش حملے میں ہلاک ہونے والوں میں اکثریت ان طلباء کی تھی جو امتحان دینے جارہے تھے۔انکے بقول حملے میں پانچ سکیورٹی گارڈ بھی ہلاک ہوئے تھے۔

کالج عراق کی دوسری بڑی یونیورسٹی مستنصریہ کے زیر انتظام ہے جس سے پہلے ہی بند ہونے کی دھمکیاں مل چکی تھیں۔

یہ پہلا موقع نہیں ہے کہ یونیورسٹی کو پرتشدد کارروائیوں کو نشانہ بنایا گیا ہو۔

گزشتہ ماہ بھی یونیورسٹی کی ایک اہم عمارت کے قریب دو کار دھماکوں اور ایک خودکش حملے میں ایک سو سے زیادہ طلباء ہلاک ہوئے تھے۔

ایسے وقت میں جب عراق میں فرقہ وارانہ تشدد جاری ہے لندن میں قائم ایک تھنک ٹینک نے خبردار کیا ہے کہ ترکمان ، عیسائی اور بہائی اقلیتیں بڑے پیمانے پر تشدد کا سامنا کر رہی ہیں۔

رپورٹ کا کہنا ہے کہ اقلیتوں کی مذہبی عمارات کو تباہ کیا جارہا ہے جبکہ غیر مسلمانوں کو قتل کی دھمکیوں، جنسی زیادتیوں اور جبری شادیوں کے ذریعے سے مذہب بدلنے پر مجبور کیا جا رہا ہے۔