ہیلری کلنٹن کہتی ہیں کہ وہ ذاتیات کی سیاست میں نہیں پڑنا چاہتیں

یہ نزع اس وقت شروع ہوئی جب ہالی وڈ کی ایک با اثر شخصیت ڈیوڈ جیفن نے ہیلری کلنٹن کے حریف بیرک اوبامہ کے لیے فنڈ جمع کرنے کے لیے منعقدہ ایک تقریب کی میزبانی کی اور ایک انٹرویو میں کہہ دیا کہ ہیلری کلنٹن میں حصولِ اقتدار کی امنگ کچھ زیادہ ہی ہے۔

جیفن نے جنہوں نے ماضی میں سابق صدر بل کلنٹن کی حمایت کی تھی، یہ بھی کہا کہ بہت ممکن ہے کہ سابق خاتونِ اول کے صدر بننے سے امریکہ میں تفریق و تضاد بڑھ جائے۔

تاہم اس بیان کے بعد ہیلری کلنٹن کے کیمپ نے مطالبہ کیا کہ بیرک اوبامہ جیفن کے بیان کی مذمت کریں مگر اوبامہ کیمپ نے ایسا کرنے سے انکار کر دیا ہے۔

	کئی مشہور شخصیات نے بیرک اوبامہ کی حمایت کا اعلان کیا ہے

ہیلری کلنٹن کے کیمپ نے اس قضیے کے بعد بیرک اوبامہ کے اس عہد پر سوال اٹھایا کہ وہ سیاست کے اس رخ سے پرے رہیں گے۔

جب ریاست نویڈا میں ہیلری کلنٹن سے تبصرے کو کہا گیا تو ان کا کہنا تھا: ’میں اپنی صدارتی مہم مثبت انداز میں چلانا چاہتی ہوں۔ میں قطعاً نہیں چاہتی کہ ڈیموکریٹ یا ان کے حمایتی ذاتی حملوں کی سیاست میں ملوث ہوں۔‘

بیرک اوبامہ کو کئی نامور شخصیات کی حمایت حاصل ہے۔ ان کے ایک ترجمان نے کہا ’ہم کلنٹن کی جوڑی اور ایک ایسی شخصیت کے درمیان نہیں آنا چاہتے جو کبھی سابق صدر اور سابق خاتونِ اول کی سب سے زیادہ طرف دار تھی۔‘