نجف کے نواح میں ہونے والی لڑائی میں امریکی ٹینکوں اور ہیلی کاپٹروں نے بھی حصہ لیا

خبر رساں ادارے اے ایف پی نے پولیس ذرائع سے منسوب ایک خبر میں بتایا کہ ہلاک والوں کی تعداد دو سو پچاس سے زیادہ ہے۔ ایک اور خبر رساں ایجنسی رائٹرز نے ایک عراقی پولیس اہلکار کا حوالہ دیتے ہوئے خبر دی ہے کہ نجف کے نواح میں ہونے والی لڑائی میں امریکی ٹینکوں اور ہیلی کاپٹروں نے بھی حصہ لیا۔

رائٹرز نے سیاسی ذرائع کے حوالے سے بتایا کہ مزاحمتکاروں میں بظاہر شیعہ اور سنی دونوں فرقوں سے تعلق رکھنے والے افراد شامل تھے جو ایک مذہبی رہنما آیت اللہ سید احمد بغدادی کے حامی بتائے جاتے ہیں۔

رائٹرز نے ایک افسر کرنل علی کے حوالے سے بتایا لڑائی رات گئے تک جاری تھی۔

اس سے قبل نجف کے گورنر نے کہا تھا کہ مزاحمتکاروں کے ساتھ جھڑپ میں ایک امریکی ہیلی کاپٹر تباہ ہو گیا تھا۔ ایک مقامی پولیس اہلکار کے مطابق ہیلی کاپٹر کے عملے کے دو ارکان ہلاک ہو گئے ہیں۔ امریکی فوج نے کہا ہے کہ وہ اس واقعے کی تحقیقات کر رہے ہیں۔

عراقی پولیس نے بتایا کہ بغداد میں اور اس کے گرد سے چون افراد کی لاشیں ملی ہیں جن کی شناخت نہیں ہو سکی۔ سنیچر کے روز چالیس افراد کی لاشیں ملی تھیں۔