صدر شاویز کو کاسترو کا بہت قریبی ساتھی سمجھا جاتا ہے

ریو ڈی جنیرو میں ایک اجلاس سے خطاب کے دوران یوگو شاویز نے کہا کہ انہوں نے اس ہفتے کے آغاز میں اسی سالہ رہنما سے بات کی۔ صدر شاویز کو کاسترو کا بہت قریبی ساتھی سمجھا جاتا ہے۔

صدر کاسترو گزشتہ چھ ماہ کے عرصے کے دوران لوگوں کے سامنے نہیں آئے۔ انہیں آخری بار اس وقت دیکھا گیا تھا جب انہوں نے اپنے عہدے کے اختیارات اپنے بھائی رال کاسترو کو منتقل کرنے کا اعلان کیا تھا۔

یوگو شاویز فیدل کاسترو کے قریبی ساتھی رہے ہیں اور کہا جارہا ہے کہ اگر کسی کو کاسترو کی صحت کی اصل حالت کا علم ہے تو وہ یوگو شاویز ہی ہیں۔

شاویز کا کہنا ہے کہ کاسترو کی حالت ’نازک‘ ہے۔ انہوں نے یہ بھی کہا کہ ان کا دوست زندگی و موت کی جنگ لڑ رہا ہے۔

صدر شاویز کا یہ بیان کیوبا کے حکومتی کنٹرول کے تحت چلنے والے ذرائع ابلاغ پر نشر نہیں کیا گیا ہے۔ کیوبا میں گزشتہ ساڑھے پانچ ماہ کے عرصے کے دوران صدر کاسترو کی بیماری کی کوئی خبر منظر عام پر نہیں آئی۔

اس معاملے کو کیوبا میں ’حکومت کے خفیہ راز‘ کے طور پر لیا جارہا ہے۔

اگرچہ کیوبا کے چند لوگ کاسترو کی صحت کے بارے میں سپین سے آنے والی اطلاعات سے باخبر ہیں تاہم ہوانا سے ایسی کسی صورتحال کی جھلک نہیں ملتی۔