کیوبا کے صدر فیدل کاسترو 1959 سے بر سرِاقتدار ہیں

اس سلسلے میں صدر کاسترو کا بیان ان کے سیکرٹری نے قومی ٹیلی وژن پر پڑھ کر سنایا۔

بیان کے مطابق صدر کاسترو کی طبیعت ارجنٹائن کے دورے اور کیوبا کے انقلاب کی تقریبات کے بعد خراب ہوئی۔ وہ انتہائی تھکن کا شکار ہوئے اور ان کی آنت کے اندر زخموں سے خون بہنا شروع ہو گیا۔

فیدل کاسترو نے 1959 سے کیوبا میں اقتدار سنبھالا ہوا ہے۔ انہوں نے اپنے بعد اپنے بھائی اور ملک کے وزیرِ دفاع راؤل کاسترو کو صدر نامزد کیا ہوا ہے۔ بیان میں کہا گیا ہے کہ صدر کاسترو نے اپنے کچھ اختیارت وقتی طور پر اپنے بھائی کو منتقل کیئے ہیں۔

فیدل کاسترو کی عمر اس ماہ کی تیرہ تاریخ کو 80 برس ہو جائے گی اور اس موقع پر ملک بھر میں جشن منایا جانا تھا لیکن یہ تقریبات اب دسمبر تک ملتوی کر دی گئی ہیں۔