پاکستان کو مزید کوشش کرنے کی ضرورت ہے: کانڈولیزا رائس

مشرق وسطیٰ کے دورے پر روانہ ہونے سے پہلے امریکی وزیر خارجہ نے بی بی سی سے بات کرتے ہوئے کہا کہ پاکستان امریکہ کا اچھا اتحادی رہا ہے لیکن یہ سب جانتے ہیں کہ جب سے پاکستان بنا ہے قبائلی علاقوں میں حکومت نام کی کوئی چیز نہیں رہی ہے۔

’پاکستان القاعدہ کی پناہ گاہ‘

۔پاکستان نے امریکی الزام مسترد کر دیا

امریکی وزیر خارجہ نے کہا کہ پاکستان کے لیے یہ یقینی بنانا ضروری ہے کہ فاٹا القاعدہ اور طالبان کے لیے پناہ گاہ نہ بننے پائیں۔’اس مسئلے پر کچھ پیش رفت بھی ہوئی ہے لیکن امریکہ اس پر مزید پیش رفت کا خواہاں ہے۔‘

امریکی انٹیلیجنس ڈائریکٹر نے سینٹ کمیٹی کے سامنے بیان میں کہا تھا کہ القاعدہ کی قیادت پاکستان میں اپنے محفوظ مقامات سے دوبارہ منظم ہو رہی ہے۔ پاکستان نے امریکی اہلکار کے بیان کو رد کرتے ہوئے کہا کہ دہشتگردی کی جنگ میں پاکستان نے جتنا کردار ادا کیا کہ کسی اور ملک نہیں کیا۔

امریکی وزیر خارجہ کونڈولیزا رائس سنیچر سے مشرقِ وسطی کا دورہ شروع کر رہی ہیں۔ اپنے اس دورے میں وہ مصر ، اردن اور کئی دوسرے عرب ممالک کے رہنماؤں سے مل کر انہیں یہ قائل کرنے کی کوشش کریں گی کہ عراق میں ایران کا اثرو رسوخ روکنے کے لیے عراق کی مدد کرنا بہت ضروری ہے ۔

امریکی وزیر خارجہ کونڈولیزا رائس نے کہا کہ کہ عراق کی مدد عرب ممالک کے مفاد میں ہے۔ انہوں نے کہا کہ ایک ایسا عراق جو مستحکم ہو ، جہاں صدام حسین نہ ہو، جہاں شیع اکثریت کی حکومت سنیوں کے ساتھ منصفانہ طریقے سے پیش آ رہے ہوں۔ اور ایسا عراق جو خطے میں ایران کے اثر پھیلانے کی بجانے اسے کے راستے میں ایک رکاوٹ ہو وہ سب عرب ملکوں کے مفاد میں ہے۔

انہوں نے کہا ہے کہ عراق میں سیاسی عمل میں سنیوں سمیت تمام عراقیوں کو شامل کرنے کی کوششوں میں عرب ممالک پہلے بھی شریک رہے ہیں اور وہ چاہتی ہیں کہ عراق کے پڑوسی ممالک عراقی حکومت کی مدد کرنے کا سلسلہ جاری رکھیں۔