’ یہ مہم اس قابل ہے کہ اس میں قربانیاں دی جا سکیں‘

انہوں نے یہ بات آٹھ امریکی فوجیوں پر حدیثہ کے قتلِ عام کے سلسلے میں فردِ جرم عائد کیئے جانے کے بعد خبر رساں ادارے ایسوسی ایٹڈ پریس کو انٹرویو دیتے ہوئے کہی۔

امریکی فوجیوں پر فردِ جرم عائد

بی بی سی کے نمائندے جسٹن ویب کے مطابق انٹرویو میں امریکی وزیرِخارجہ نے واضح کیا کہ انہیں یقین ہے کہ اب بھی عراق کو مشرقِ وسطٰی کے حوالے سے امریکی حکمتِ عملی کے مرکزی حصے کے طور پر دیکھا جائے گا۔

انہوں نے تسلیم کیا کہ عراق میں بہت قربانیاں دینا پڑی ہیں تاہم ان کا کہنا تھا کہ یہ مہم اس قابل ہے کہ اس میں قربانیاں دی جا سکیں۔ انہوں نے کہا کہ بہت سے عوامل ایسے ہیں جن سےظاہر ہوتا ہے کہ عراق میں امریکی مہم جاری رہنی چاہیئے کیونکہ جب یہ ملک ایک نئے لحاظ سے ابھرے گا تو مشرقِ وسطٰی کا ایک نیا روپ سامنے آئےگا۔

امریکی صدر بش پر بھی کانگریس میں دباؤ بڑھتا جا رہا ہے کہ وہ عراق میں جنگ کے حوالے سے نئی حکمتِ عملی تلاش کریں۔ حالیہ مہینوں میں وائٹ ہاؤس کے متعدد مشیر یہ تجویز دے چکے ہیں کہ مشرقِ وسطٰی میں دراصل عرب اسرائیل مفاہمت ہی امن کی کنجی ثابت ہو سکتی ہے۔