صدر بش کا کہنا ہے کہ یہ سال امریکی فوجیوں کے لیے مشکل ترین تھا اورآئندہ مشکلیں بڑھ سکتی ہیں

صدر جارج بش نے واشنگٹن پوسٹ کا ایک انٹرویو دیتے ہوئے کہا کہ عراق میں ’امریکی فوج نہ ہی جیت رہی ہے اور نہ ہی ہار رہی ہے۔‘

اس سے قبل انہوں نے وزیر دفاع کی عراق روانگی سے قبل ایک بیان میں کہا تھاکہ آنے والے برسوں میں عراق میں جنگ مزید قربانیاں مانگے گی اور اس کے لیے مشکل فیصلے کرنا پڑیں گے۔

انہوں نے کہا کہ وہ عراق میں فوج کی تعداد میں اضافہ کرسکتے ہیں لیکن ابھی اس معاملے پر کوئی حتمی فیصلہ نہیں ہوا ہے۔

تاہم انہوں نے کہا کہ وہ امریکی فوج اور میرین کی تعداد میں مستقل بنیادوں پر اضافہ کرنے کے حق میں ہیں تاکہ دنیا کے مستقبل کو پرامن بنایا جا سکے۔

صدر بش نے کہا کہ امریکی فوجیوں اور عراقی عوام کے لیے یہ سال مشکل ترین تھا۔’امریکہ عراقیوں سے دو ہزار سات میں کچھ اور زیادہ چاہتا ہے۔‘

صدر بش نے اس بات کو تسلیم کیا کہ مزاحمت کاروں نے امریکی فوجیوں کی عراق کو مستحکم کرنے کی کوشش کو ناکام بنادیاہے۔

تاہم انہوں نے کہا کہ ’عوام کی سیکیورٹی کے لیے ضروری ہے کہ ہم اپنی کوششوں میں کمی نہ کریں۔‘

بدھ کے روز امریکہ نے صوبہ نجف کی سکیورٹی کے معاملات کو بھی عراقی حکومت کے حوالے کردیا ہے۔ نجف عراقی حکومت کے ماتحت آنے والا تیسرا صوبہ ہے۔

انہوں نے نئے وزیر دفاع گیٹس پر اعتماد کا اظہار کیا اور کہا کہ وہ عراق کی نئی حکمت عملی طے کرنے میں اہم کردار ادا کریں گے۔

رابرٹ گیٹس عراق میں کمانڈرز سے ملاقات میں صلاح و مشورہ کریں گے تاکہ صدر بش کو نئی حکمت عملی ترتیب کرتے وقت وہاں کے حالات سے آگاہ کر سکیں۔

صدر بش آئندہ ماہ عراق کے لیے نئی حکمت عملی کا اعلان کرنے والے ہیں۔