نِک چائلڈز بی بی سی نیوز

	جنوبی صوبوں ہلمند اور قندھار کے لوگوں میں مایوسی اور بھی زیادہ ہے

بی بی سی ورلڈ سروس اور امریکی نشریاتی ادارے اے بی سی نیوز کی طرف سے مشترکہ طور پر کرائے گئے اس سروے میں افغانستان کے مختلف علاقوں سے تعلق رکھنے والے ایک ہزار بالغ افراد سے بات کی گئی ہے۔

انہیں دو اداروں کی طرف سے پچھلے برس کرائے گئے سروے میں ستتر فیصد لوگوں کا خیال تھا کہ ان کا ملک صیح سمت میں جا رہا ہے، لیکن تازہ ترین سروے میں ایسے پرامید لوگوں کی تعداد اب پچپن فیصد ہوگئی ہے۔

جن لوگوں کا خیال ہے کہ امن و امان کی صورتحال اب طالبان دور سے بہتر ہے، ان کی شرح پچھتر فیصد سے کم ہو کر اٹھاون فیصد رہ گئی ہے۔ اپنے ذاتی مستقبل کے بارے میں پرامیدی چون فیصد سے کم ہوکر تیرہ فیصد ہوگئی ہے۔

طالبان اور نیٹو افواج کے درمیان میدان جنگ بنے ہوئے افغانستان کے جنوبی صوبوں قندھار اور ہلمند میں اس حوالے سے اعدادوشمار اور بھی زیادہ پریشان کن ہیں۔

	پوست کی کاشت کو جائز سمجھنے والوں کی تعداد میں بھی اضافہ ہوا ہے

سروے کے مطابق اگر (ناامیدی کا) یہی رحجان رہا تو یہ کابل، واشنگٹن اور لندن میں بیٹھے حکام کے لیے ایک پریشان کن صورتحال ہوگی۔ دوسری طرف ان کے لیے یہ بات راحت کا باعث ہوگی کہ لوگوں کی ایک مثبت اکثریت ابھی بھی موجودہ دور کو طالبان کے دور سے بہتر سمجھتی ہیں۔

لیکن تقریباً اسی فیصد لوگ حکومتی بدعنوانی سے خائف ہیں، جبکہ پچھلے برس کی نسبت ان لوگوں کی تعداد میں اضافہ ہوا ہے جو مغربی ممالک کی حکمت عملی کے برخلاف پوست کی کاشت کو جائز سمجھتے ہیں۔ پوست کاشت کرنے والے علاقوں میں ایسے لوگوں کی تعداد ساٹھ فیصد ہے۔

اس سروے کے مطابق اگرچہ طالبان کو محدود حمایت حاصل ہے لیکن لوگوں کی اکثریت انہیں (طالبان) افغانستان کو درپیش سب سے بڑا خطرہ قرار دیتی ہے۔