سشیل شرما بی بی سی نیوز، کٹھمنڈو

	شاہ گیانندرا کو تمام انتظامی اختیارات سے محروم کیا جا چکا ہے

پینل کے ایک رکن نے بی بی سی کو بتایا ہے کہ شاہ کے علاوہ اقتدار سے ہٹائی گئی شاہی حکومت کے دو سو افسران کو بھی اس سلسلہ میں ملوث پایا گیا ہے۔

یاد رہے کہ سخت کرفیو کے دوران ہونے والے جمہوریت پسند مظاہروں میں پولیس کی فائرنگ سے اکیس افراد ہلاک اور ہزاروں زخمی ہو گئے تھے۔ ان مظاہروں کی وجہ سے شاہ گیانندرا اپنا براہ راست اقتدار ختم کر کے پارلیمان کو دوبارہ بحال کرنے پر مجبور ہو گئے تھے۔

پینل کی رپورٹ کی تفصیلات ابھی تک منظر عام پر نہیں آئی ہیں لیکن پیر کو اپنی رپورٹ وزیر اعظم گرجا پراساد کوئرالا کو پیش کرنے کے بعد، پینل کے رکن نے تصدیق کی کہ اس میں شاہ گیانندرا کو طاقت کا ناجائز استعمال کرنے کا قصور وار ٹھہرایا گیا ہے۔

پینل کے رکن ہری ہار براہی نے بی بی سی کو بتایا کہ دوسرے دو سو افراد میں شاہی حکومت کے سینیئر وزراء اور سکیورٹی کے اعلی عہدیددار شامل ہیں۔

ان کا کہنا تھا کہ نیپال کی اس شاہی کابینہ کو ذمہ دار قرار دیا گیا ہے جو شاہ گیانندرا کے پندرہ ماہ کے براہ راست اقتدار کے دوران ملک کا نظم و نسق چلا رہی تھی۔

واضح رہے کہ طاقت کے ناجائز استعمال کے الزام میں ملوث قرار دیے جانے کے باوجود شاہ کو کوئی سزا نہیں دی جا سکتی کیونکہ نیپال کے موجودہ قانون کے مطابق وہ قانون سے بالا ہیں۔ دوسرے الفاظ میں شاہ کو سزا دینے کے لیئے حکومت کو نئے قوانین بنانے پڑیں گے۔

وزیراعظم پہلے ہی کہہ چکے ہیں کہ حکومت کسی کو معاف نہیں کرے گی لیکن وہ کوئی بھی فیصلہ رپورٹ کرنے کے بعد ہی کرے گی۔

رپورٹ لکھنے والے پینل کے پانچ میں سے دو ارکان نے اس کے نتائج سے اختلافات کی وجہ سے حتمی رپورٹ پر دستخط نہیں کیے ہیں۔ پینل کی صدارت سپریم کورٹ کے ریٹائرڈ جج کرشنا جنگ رایامجھی نے کی۔

	رپورٹ میں پولیس پر مظاہرین کے خلاف بے جا طاقت کے استعمال کا الزام لگایا گیا ہے

اقتدار سے الگ کیے جانے کے بعد شاہ گیانندرا کو تمام انتظامی اختیارات سے محروم کیا جا چکا ہے جن میں ملک کی نوے ہزار فوج پر کنٹرول بھی شامل تھا۔ اس وقت سے نیپال میں شاہی دور کے مکمل خاتمے کے مطالبات مسلسل ہوتے رہے ہیں۔

جس قانون ساز اسمبلی نے نیپال میں شہنشاہیت کے مستقبل کا فیصلہ کرنا ہے، اس کے لیئے انتخابات اگلے سال کے اوائل میں متوقع ہیں۔