دونوں فریقین تشدد بھڑکانے کی ذمہ داری ایک دوسرے پر عائد کرتے ہیں

الاقصٰی بریگیڈ نے کہا ہے کہ وہ دونوں جماعتوں کے درمیان مسلح تصادم کے لیئے حماس کے رہنماؤں کو ذمہ دار سمجھتے ہیں۔

تنظیم کے ایک بیان میں یہ بھی کہا گیا ہے کہ ’ہلاک کرنے کے لیئے حماس کے تین رہنماؤں کی نشاندہی بھی کرلی گئی ہے‘۔

دونوں جماعتوں کے مسلح افراد کے درمیان جھڑپیں غزہ میں اتوار سے شروع ہوئی تھیں جن میں آٹھ افراد ہلاک اور 60 زخمی ہوئے تھے۔ مزید جھڑپوں میں دو افراد پیر کو بھی ہلاک ہوئے تھے۔

حماس کے مارچ میں اقتدار سنبھالنے کے بعد سے اس جھڑپ کو دونوں گروہوں کے درمیان بدترین تصادم خیال کیا جارہا ہے۔

فلسطین کے صدر محمود عباس اور وزیرِاعظم اسماعیل ہانیہ نے لوگوں سے پر امن رہنے اور فوری طور پر پرتشدد کارروائیاں روکنے کی اپیل کی ہے۔

القصٰی کے بیان میں کہا گیا ہے ’ہم اعلان کرتے ہیں کہ ہم حماس کے سربراہ خالد مشال، سعد صیام اور یوسف الازہر کو قتل کردیں گے تاکہ یہ حکمرانی ختم ہو اور ان کی ہلاکت دوسروں کے لیئے مثال بن سکے‘۔

خالد مشال دمشق میں حماس کے سیاسی سربراہ ہیں، سعد صیام وزیر داخلہ ہیں اور یوسف الازہر وزارت داخلہ کے اعلٰی اہلکار ہیں۔

ہم اعلان کرتے ہیں کہ ہم حماس کے سربراہ خالد مشال، سعد صیام اور یوسف الازہر کو قتل کردیں گے تاکہ یہ حکمرانی ختم ہو اور ان کی ہلاکت دوسروں کے لیئے مثال بن سکے۔ الاقصٰی بریگیڈ

ان کا یہ بیان الاقصٰی کے مسلح افراد کی کئی کارروائیوں کے بعد سامنے آیا ہے جن میں تنظیم نے غزہ کے کئی سکول زبردستی بند کروادیے اور غزہ کی ایک اہم شاہراہ بلاک کردی۔

تنازع کی بنیاد حماس حکومت کی جانب سے سرکاری ملازمین کا تنخواہیں نہ ادا کرنا ہے۔ حکومت کے پاس اتنے فنڈز نہیں کہ وہ تنخواہیں ادا کرسکے۔

مغربی ممالک نے حماس حکومت کے اقتدار میں انے کے بعد سے فلسطین کی امداد بند کردی ہے۔

سول سرونٹ اور الفتح سے منسلک سکیورٹی اہلکار پوری تنخواہوں کا مطالبہ کررہے ہیں۔

کہا جارہا ہے کہ محمود عباس اور اسماعیل ہانیہ بھی اقتدار کے لیئے ’جدوجہد‘ کے تنازع میں الجھ کر رہ گئے ہیں۔ دونوں رہنما متحدہ حکومت بنانے کی کئی ناکام کوششیں کرچکےہیں۔