ردا کے علاقے میں سفارت خانے اور اعلیٰ سرکاری حکام کی رہائش گاہیں ہیں

حکام کے مطابق دو کاروں میں سوار چار حملہ آور نعرے لگاتے ہوئے امریکی سفارتخانے کی طرف بڑھ رہے تھے۔ انہوں نے گاڑیوں سے فائرنگ کی اور دستی بم بھی پھینکے۔

امریکہ وزیر خارجہ کنوڈولیزا رائس نے شام کی سکیورٹی فورسز کی کاکردگی کو سراہا ہے۔

شام کے حکام کے مطابق سکیورٹی اہلکاروں نے اس حملے کو ناکام بنادیا اور چار میں سے تین مسلح حملہ آووروں کو موقع پر گولی مار کر ہلاک کردیا جبکہ چوتھا زخمی ہوگیا اور اسے گرفتار کرلیا گیا۔

اطلاعات کے مطابق کم از کم ایک سکیورٹی اہلکار حملہ آووروں کی گولی کی زد میں آکر ہلاک ہوا ہے جبکہ امریکی سفارت خانے کے اہلکار اس واقعے میں محفوظ رہے۔

حکام کے مطابق حملہ آووروں نے کار بم کا دھماکہ کرنے کی کوشش بھی کی تاہم وہ اس میں ناکام رہے۔

شام کے حکام کا کہنا ہے کہ معاملے کی تحقیقات شروع کردی گئی ہیں۔

گزشتہ چند ماہ کے دوران شام کے سکیورٹی اہلکاروں اور مسلم شدت پسندوں کے درمیان کئی مسلح جھڑپیں ہوچکی ہیں۔

دمشق میں گزشتہ چند سالوں سے دہشت گردی کی کئی وارداتیں ہوچکی ہیں۔

شام کے وزیر داخلہ بسام عبدل المجید نے کہا ہے کہ دہشت گردی کی ایک کارروائی میں امریکی سفارت خانے کو نشانہ بنانے کی کوشش کی گئی ہے۔ انہوں نے کہا کہ سکیورٹی فورسز نے حالات پر قابو پالیا ہے۔

ٹی وی پر دکھائی گئی فلم میں فٹ پاتھ پر خون کے علاوہ پائپ اور گیس کے کنستر دکھائے گئے جس سے لگتا تھا کہ یہ کوئی گھریلو ساخت کا بم تھا۔

دمشق میں امریکی سفارت خانے پر حملہ ایک ایسے وقت کیا گیا ہے جب شام اور امریکہ کے تعلقات لبنان پر اسرائیلی حملے کی وجہ سے کشیدگی کا شکار ہیں۔

امریکہ شام پر الزام عائد کرتا رہا ہے کہ وہ عراق میں دہشت گردی کی حمایت کر رہا ہے اور حزب اللہ کو ہتھیاروں کی ترسیل کو روکنے کے لیئے مناسب اقدام نہیں کر رہا۔

اس سال جون میں سکیورٹی فورسز نے سرکاری ٹیلی ویژن کے قریب دہشت گردوں کی ایک کارروائی ناکام بنا دی تھی جس میں چار افراد ہلاک ہو گئے تھے۔

اُس سے قبل اپریل دو ہزار چار میں دمشق کے سفارتی علاقے میں دہشت گردوں اور سکیورٹی فورسز کے درمیان جھڑپ میں چار افراد ہلاک ہو گئے تھے۔