وسعت اللہ خان بی بی سی اردو ڈاٹ کام، بیروت

	حسن نصرا اللہ نے کہا ہے کہ یہ مناسب وقت نہیں ہے کہ چھاپہ ماروں کوغیر مسلح کرنے کے بارے میں سرعام بات چیت کی جائے۔

دوسری طرف لبنان کے وزیردفاع الیاس مُر نے کہا ہے کہ اگلے بہتّر گھنٹے میں پندرہ ہزار لبنانی فوجی جنوبی لبنان میں جانے کے لیئے تیار ہوں گے۔ انہوں نے کہا کہ یہ فوجی حزب اللہ کو غیر مسلح کرنے کے لیئے استعمال نہیں کیئے جائیں گے۔ انہوں نے کہا کہ جو کام اسرائیلی فوجی نہیں کر سکے وہ لبنانی فوج کیونکر انجام دے سکتی ہے۔ انہوں نے کہا کہ لبنانی فوجیوں کو اس وقت تک سرحد پر تعینات نہیں کیا جائے گا جب تک بین الاقوامی امن فوج لبنان نہیں پہنچ جاتی۔

دریں اثناء حزب اللہ کے سربراہ حسن نصرا اللہ نے کہا ہے کہ یہ مناسب وقت نہیں ہے کہ حزب اللہ کے چھاپہ ماروں کو غیر مسلح کرنے کے بارے میں سرعام بات چیت کی جائے۔ انہوں نے کہا کہ لبنان میں پندرہ ہزار گھروں کی تعمیرومرمت کا کام فوری طور پر شروع کیا جا رہا ہے اور جن لوگوں کے گھر مکمل طور پر تباہ ہو چکے ہیں انہیں فوری طور پر گھر کی چھت فراہم کرنے کے لیئے ایک سال تک کا کرایہ مہیا کیا جا رہا ہے۔

گزشتہ رات حزب اللہ کے ٹی وی چینل المنار پر حسن نصرا للہ کی نشری تقریر کے بعد بیروت آتش بازی سے گونج اٹھا۔ نوجوان لڑکے موٹر سائیکلوں پر سوار ہو کر گھروں سے باھر نکل آئے اور بیروت کے بعض حصوں میں جشن کا سا سماں دیکھنے میں آیا۔

اسرائیلی فوج لبنان کا بری، بحری اور فضائی ناکہ بندی جاری رکھے ہوئے ہے تاکہ بقول اس کے حزب اللہ چھاپہ ماروں تک باہر سے اسلحہ نہ پہنچایا جا سکے۔

جنگ بندی کے آغاز کے بعد سے لوگوں کی اپنے گھروں کو روانگی کا سلسلہ جاری ہے اور ملک کے مختلف حصوں میں گاڑیوں کے طویل قافلے دیکھنے میں آ رہے ہیں جبکہ لبنان کی سول ڈیفنس نے لوگوں کو خبردار کیا ہے کہ لوگ ملک میں جا بجا بکھرے ہوئے اسلحے اورگولہ بارود سے ہو شیار رہیں۔ سول ڈیفنس کے مطابق پیر کے روز ایسے ہی واقعات میں دو افراد ہلاک اور نو زخمی ہو گئے
تھے۔

تل ابیب سے شائع ہونے والے اخبار ہارٹز کے ایک عوامی جائزے کے مطابق پچاسی فیصد اسرائیلی حزب اللہ کے خلاف جنگ کے نتائج سے مایوس ہیں جبکہ برسراقتدار قدیمہ پارٹی کے مقبولیت میں ایک تہائی کمی آئی ہے۔