شہزادہ چارلس کی سرکاری رہائش گاہ نے اس واقعہ پر بیان دینے سے انکار کردیا

ان تینوں افراد کو منگل کو گرفتار کیا گیا تھا۔ ان میں ’نیوز آف دی ورلڈ‘ کے شاہی مدیر کلائیو گڈ مین بھی شامل تھے۔

گرفتارشدگان کی عمریں 35، 48 اور 50 سال ہیں اور انہیں لندن سے گرفتار کیا گیا تھا۔ یہ گرفتاریاں شہزادہ چارلس کی مواصلات کی سیکرٹری اور شہزادہ ولیم اور ہیری کے لیئے کام کرنے والے عملے کے دو ارکان کی شکایت پر کی گئی تھیں۔پولیس اب یہ جاننے کی کوشش بھی کر رہی ہے کہ آیا ملک کی دیگر نامور شخصیات اور سیاستدانوں کی فون کالیں بھی خفیہ طور پر ٹیپ تو نہیں کی جا رہیں۔

پولیس کا کہنا ہے کہ اگر ایسا ہوا ہے تو یہ سکیورٹی کے لیئے خطرے کا باعث ہے۔ یہ تحقیقات انسداد دہشتگردی کے شعبے کے سپرد کردی گئی ہیں۔

پولیس کی جانب سے ایک بیان میں کہا گیا ہے کہ پولیس کو یقین ہے کہ شاہی خاندان کے علاوہ بھی اہم شخصیات کی فون کالیں سنی جاتی رہی ہیں۔ پولیس فون کمپنیوں کے ساتھ مل کر گزشتہ چار ماہ سے تحقیقات کر رہی ہے۔

شہزادہ چارلس کی سرکاری رہائش گاہ نے اس واقعہ پر بیان دینے سے انکار کردیا ہے۔