اس وقت سعودی عرب کے علاوہ تمام خلیجی ممالک میں خواتین کابینہ کا حصہ ہیں

ان انتخابات میں پہلی مرتبہ خواتین کو بھی قومی سطح پر انتخابات میں حصہ لینے اور ووٹ ڈالنے کا حق دیا گیا تھا۔

پچاس رکنی پارلیمان میں سرکاری امیدواروں کے مقابلے میں اصلاح پسندوں کو نمایاں کامیابی ملی ہے۔

جمعرات کو ہونے والے انتخابات میں لوگوں کی دو گنا سے بھی زائد تعداد نے حصہ لیا۔ انتخابات میں خواتین ووٹروں کے ووٹ ہمیشہ سے ہی اہم کردار ادا کرتے رہے ہیں۔

اصلاح پسندوں کی انتخابات میں کامیابی سے حکومت کو یہ پیغام پہنچ گیا ہے کہ عوام کویتی نظام میں تبدیلی چاہتے ہیں۔ اصلاح پسندوں کی انتخابی مہم کا بنیادی ایجنڈا ملک سے کرپشن کا خاتمہ تھا۔

انتخابات کے نتائج بتاتے ہیں کہ آگے چل کر حکومت اور اصلاح پسندوں کے درمیان ٹکراؤ ہوگا۔

انتخابی مہم کے دوران اصلاح پسندوں نے عوام سے وعدہ کیا تھا کہ ملک سے کرپشن کے خاتمے کے لیے پارلیمان میں ایک ایسا آئینی بل پیش کیا جائے گا کہ جس کی رو سے انتخابی حلقوں کی تعداد پچیس سے گھٹا کر پانچ کر دی جائے۔

	اصلاح پسندوں کی انتخابی مہم کا مرکز ملک سے کرپشن کا خاتمہ تھا

یہی وہ نکتہ تھا کہ جس پر حزب مخالف کی جماعتوں کے اراکین پارلیمان نے مخالفت کرتے ہوئے پارلیمان کا بائیکاٹ کیا اور جوابًا کویت کے امیر شیخ صباح الاحمد الصباح نے پارلیمان کو تحلیل کرتے ہوئے نئے انتخابات کا اعلان کر دیا۔

اس مرتبہ انتخابات میں خواتین تو منتخب نہیں ہو سکی ہیں تاہم ایسا معلوم ہوتا ہے کہ نئی پارلیمان نظام حکومت میں مزید اصلاحات کے لیے دباؤ ڈالے گی جس سے توقع ہے کہ خواتین امیدوار آئئندہ انتخابات میں کامیابی حاصل کر لیں گی۔

اس وقت سعودی عرب کے علاوہ تمام خلیجی ممالک میں خواتین کابینہ کا حصہ ہیں۔ بحرین، قطر اور اومان میں پہلے ہی خواتین کو ووٹ ڈالنے کی اجازت دی جا چکی ہے۔ اگرچہ ان ممالک میں کوئی خاتون رکن منتخب نہیں ہو سکی ہے تاہم خواتین کو نامزدگی کے ذریعے پارلیمان میں نمائندگی دی گئی ہے۔