’یہ اجلاس وینکوور کی بجائے ممبئی یا قاہرہ میں منعقد ہونا چاہیئے تھا‘

انڈیا کی ایک کچی آبادی کے سابقہ رہائشی جوکن ارپوتھم نے ورلڈ اربن فورم کے مقامِ انعقاد اور اس میں شامل وفود کو بھی تنقید کا نشانہ بایا اور کہا کہ یہ افراد غربت کے خاتمے سے زیادہ اپنی رپورٹیں لکھنے میں دلچسپی رکھتے ہیں۔

اس عالمی فورم میں دنیا بھر سے آبادی کے ماہرین اور سیاستدان شریک ہیں اور اس فورم کے منتظمین کا کہنا ہے کہ اس کا مقصد دنیا کی شہری آبادی کو درپیش مسائل کے بارے میں آگاہی پیدا کرنا اور ان پر خیالات کا تبادلہ کرنا ہے۔

انڈیا کی کچی آبادیوں کے رہائشیوں کی تنظیم کے سربراہ جوکن ارپوتھم نے اپنے خطاب میں کہا کہ’ ہم اس قسم کے اجلاسوں کے انعقاد پر کڑی تنقید کرتے ہیں۔ اس اربن فورم کے انعقاد پر بہت زیادہ رقم اور وقت صرف ہوتا ہے اور نہ جانے کتنے مشیروں کو اس قسم کے اجلاس کے انعقاد کے لیئے ملازمت دی جاتی ہے‘۔

	ممبئی کی سب سے بڑی کچی آبادی میں دس لاکھ افراد رہتے ہیں

انہوں نے کہا کہ اس قسم کے اجلاسوں کو وینکوور کی بجائے قاہرہ یا ممبئی میں منعقد ہونا چاہیے تاکہ وہاں کے شہری غرباء اپنے مسائل پر بات کر سکیں۔ ارپوتھم نے اپنی تقریر میں اقوامِ متحدہ پر بھی تنقید کی اور کہا کہ وہ نجی تعمیراتی اداروں اور حکومتی پروگراموں کی خاطر کچی آبادیوں کے رہائشیوں کی جبری بے دخلی کو روکنے میں ناکام رہی ہے۔

وینکوور میں ہونے والا یہ فورم اپنی نوعیت کا تیسرا اجلاس ہے اور اس کے ایجنڈے پر ماحول کے بچاؤ اور صاف اور صحتمندانہ ماحول کے حامل شہروں کے قیام جیسے معاملات شامل ہیں۔

اس فورم سے قبل جاری ہونے والی اقوامِ متحدہ کی ایک رپورٹ میں کہا گیا ہے کہ سنہ 2007 کے اختتام تک دنیا کی نصف آبادی شہروں میں رہائش پذیر ہوگی جبکہ ایک اندازے کے مطابق سنہ 2030 تک یہ شرح اسّی فیصد تک جا پہنچے گی۔