ملاداد اللہ بہت ’سفاک‘ شخص سمجھے جاتے تھے

افغان ذرائع نے بی بی سی کو بتایا ہے کہ ملا داد اللہ اس وقت اتحادی افواج کی حراست میں میں ہیں۔

ملا داد اللہ کون تھے

ملا داد اللہ کا شمار طالبان کے سب سے ’خطرناک‘ اور ’سفاک‘ رہنماؤں میں ہوتا تھا۔ افغانستان پر امریکی حملے سے پہلے ملا داد اللہ طالبان کی دس رکنی قیادت کے رکن تھے۔ وہ طالبان کے سربراہ ملا عمر سے بھی بہت قریب تھے۔ ماضی میں وہ بہت سے حملوں میں بچ نکلنے میں کامیاب رہے اور اسی طرح کے ایک معرکے میں ان کی ایک ٹانگ ضائع ہو گئی تھی۔

افغانستان میں امریکی اور اتحادی فوجیں ملاداد اللہ کی چار سال سے تلاش کر رہی تھیں۔

حالیہ دنوں میں جنوبی مشرقی افغانستان میں ہلمند میں ہونے والے خود کش حملوں اور تشدد کی کارروائیوں کا ذمہ دار بھی ملا داد کو ٹھہرایا جاتا ہے۔

ان کی گرفتاری کے بارے میں ابھی تفصیلات مہیا نہیں کی گئیں تاہم حکام ان کی گرفتاری کی تصدیق کر رہے ہیں۔

تین سال قبل ملا داد اللہ نے بی بی سی سے ایک انٹرویو میں کہا تھا کہ طالبان یہودی اور عیسائی حملہ آوروں کے افغانستان سے نکل جانے تک جنگ جاری رہیں گے۔

دسمبر دو ہزار پانچ میں ملا داد اللہ کو پاکستان کی ایک عدالت نے مولانا محمد شیرانی پر قاتلانہ حملے کے الزام میں عمر قید کی سزا سنائی تھی۔

گزشتہ دو دنوں میں جنوبی افغانستان میں سن دوہزار ایک میں طالبان کے زوال کے بعد سے ہونے والی اب تک کی شدید ترین لڑائی میں لگ بھگ ایک سو افراد مارے گئے ہیں۔

صوبہ ہلمند میں طالبان کے جنگجو اور اتحادی سکیورٹی افواج کے درمیان ہونے والی لڑائی میں حکام کے مطابق پچاس شدت پسند اور پولیس کے تیرہ اہلکار ہلاک ہوئے ہیں۔

قندھار میں بھی افغان اور اتحادی افواج نے مزید کارروائیاں کی ہیں اور حکام کے مطابق اس طرح کی دو کارروائیوں میں کم سے کم پچیس شدت پسند ہلاک ہوئے ہیں۔