’یہ حکومت عراقیوں کی ہے کسی ایک فرقے کی نہیں‘

ان کا کہنا ہے کہ انہیں امید ہے کہ وہ آئندہ دو دن میں نئی حکومت تشکیل دے لیں گے۔

نوری مالکی نے بتایا کہ انہیں کابینہ کے اہم عہدوں کے لیئے سنّی،شیعہ اور کرد گروہوں کی جانب سے نامزدگیاں بھی موصول ہوگئی ہیں۔ جن وزارتوں کے لیئے ان گروہوں کی جانب سے محتلف رہنماؤں کو نامزد کیا گیا ہے ان میں دفاع، تیل، داخلہ، خزانہ اور خارجہ امور کی وزارتیں شامل ہیں۔

نوری مالکی کا کہنا تھا کہ مختلف گروہوں کے درمیان تیل، خزانہ اور اس جیسی چند وزارتوں کے لیئے صحتمندانہ مقابلہ ہے۔ انہوں نے کہا کہ’ میں دو دن میں کچھ مزید امیدواروں سے ملاقات کروں گا اور مجھے یقین ہے کہ تمام مسائل حل ہو جائیں گے کیونکہ یہ حکومت عراقیوں کی ہے کسی ایک فرقے کی نہیں‘۔

عراقی صدر جلال طالبانی نے کرد اور سنّی جماعتوں کی جانب سے ابراہیم جعفری کی شدید محالفت کے بعد بائیس اپریل کو شیعہ رہنما نوری مالکی کو حکومت بنانے کی دعوت دی تھی۔

آئین کے تحت نوری مالکی کے پاس حکومت کی تشکیل کے لیئے بائیس مئی تک کا وقت ہے اس کے بعد ان کی تشکیل شدہ کابینہ کی فہرست عراقی پارلیمان کے سامنے منظوری کے لیئے پیش کی جائےگی۔