ابراہیم جعفری نے دستبردار ہونے کے تمام مطالبات مسترد کر دیئے ہیں

گزشتہ سال دسمبر میں منتخب ہونے کے بعد سے عراقی پارلیمان کا دوسرا اجلاس جمعرات کو منعقد ہو رہا ہے لیکن سیاسی تعطل کی وجہ سے پارلیمان شاید سیپکر منتخب کرنے کا پہلا کام بھی مکمل نہ کر سکے۔

وزیر اعظم کے عہدے کے لیے ابراہیم جعفری کی نامزدگی کو سنی عرب، کردوں اور شیعہ جماعتوں کے اتحاد یونائیٹد عراقی الائنس کے کچھ ارکان نے مسترد کر دیا تھا۔

تاہم ابراہیم جعفری نے وزیر اعظم کے عہدے سے برطرف ہوجانے کے مسلسل مطالبوں کو نظر انداز کر دیا ہے۔

بی بی سی کے نامہ نگار جم میؤر نے کہا ہے کہ امید کی جارہی ہے کہ یونائیٹد عراقی الائنس وزیراعظم کے عہدے کے لیئے کسی ایسے امیدوار کو نامزد کرے گی جو تمام دھڑوں کے لیے قابل قبول ہو اور حکومت کی تشکیل میں حائل تعطل کو دور کیا جا سکے۔

سیاسی تعطل کی بنا پر امریکہ اور برطانیہ کی طرف سے مختلف دھڑوں پر دباؤ ڈال کر ایک وسیع تر اتفاق رائے کی حکومت تشکیل دینے کی کوششیں ناکام رہی ہیں۔ اس سیاسی تعطل کی وجہ سے عراق عدم استحکام اور تشدد کا شکار ہے جو سن دو ہزار تین میں امریکی حملے کے بعد پیدا ہوا تھا اور تاحال جاری ہے۔

عراقی پارلیمان کے دوسرے اجلاس سے قبل یونائٹڈ عراقی الائنس اس بات پر غور کر رہی کہ اگر وزیراعظم کے عہدے کے لیے نئے امیدوار کے نام پر اتفاق نہیں ہوتا تو وہ پارلیمان کے دوسرے اجلاس کا بائیکاٹ کرے۔

ابراہیم جعفری کی الدعوہ پارٹی کے ایک عہدے دار کے مطابق ابراہیم جعفری کی طرف سے انہیں دوبارہ نامزد کرنے کی درخواست پر غور کرنے کے لیے اتحاد کی جماعتوں کا اجلاس جمعرات یا جمعہ کو منعقد ہو گا۔

ابراہیم جعفری کو اتحاد نے بہت کم اکثریت سے اس سال فروری میں وزیراعظم کے عہدے کے لیے نامزد کیا تھا۔

اس کے بعد سے ابراہیم جعفری کا یہ استدلال رہا ہے کہ انہیں جمہوری طریقے سے نامزد کیا گیا ہے اور اسی کو بنیاد بناتے ہوئے وہ وزیر اعظم کے عہدے سے دستبرار ہوجانے کے لیے کیئے جانے والے مطالبات کو مسترد کرتے رہے ہیں۔