افغان وزیر خارجہ رنگین دادفر سپانتا کابل میں ڈچ وزیر خارجہ بوٹ کے ساتھ

وزیر خارجہ کا کہنا تھا کہ یہ شدت پسند افغان حکومت کو غیرمستحکم کرنے کی کوشش کررہے ہیں اور اس سلسلے میں پاکستان مزید کچھ کرسکتا ہے۔ وزیر خارجہ سپانتا کا یہ بیان کابل میں ڈچ وزیر خارجہ برنرڈ بوٹ کے ساتھ ایک مشترکہ پریس کانفرنس کے دوران دیا گیا۔

کرمپٹن کے بیان پر پاکستان کی خفگی

اس پریس کانفرنس میں ڈچ وزیر خارجہ نے کہا کہ یہ ’واضح‘ ہے کہ طالبان پاکستان کی سرزمین کا استعمال ایک ٹھکانے کی حیثیت سے کررہے ہیں۔ ڈچ وزیر خارجہ کا کہنا تھا کہ اسے روکنے کے لیے افغانستان اور پاکستان کو سرحد پار طالبان کی دراندازی سے متعلق انٹیلیجنس کا تبادلہ کرنا چاہیے۔

اتوار کے روز ہی پاکستانی حکام نے ایک اعلٰی امریکی عہدیدار کے اس بیان پر سخت ردِ عمل کا اظہار کیا ہے کہ پاکستان کے کچھ حصے دہشت گردوں کی محفوظ پناہ گاہیں ہیں۔ وفاقی وزیر داخلہ آفتاب شیرپاؤ کا کہنا ہے کہ انہیں امریکی عہدیدار کے بیان پر حیرت ہوئی ہے۔

واضح رہے کہ امریکہ کی انسداد دہشت گردی کے ڈیپارٹمنٹ کے سربراہ ہنری کرمپٹن نے ہفتے کو کابل میں ایک اخباری کانفرنس میں کہا تھا کہ پاکستان نے انسداد دہشت گردی کے لیئے تسلی بخش اقدامات نہیں کیئے ہیں اور انہوں نے اپنے حالیہ دورہ پاکستان میں پاکستانی حکام کو اس بارے میں امریکہ کی تشویش سے آگاہ کیا ہے۔

اس کے علاوہ ہنری کرمپٹن نے یہ بھی کہا کہ ان کے خیال میں اس بات کا زیادہ امکان ہے کہ اسامہ بن لادن افغانستان کے بجائے پاکستان میں کہیں چھپے ہوئے ہیں۔

تاہم پاکستان کے وزیر داخلہ آفتاب شیرپاؤ نے بی بی سی سے بات کرتے ہوئے کہا کہ ہنری کرمپٹن نے اپنے حالیہ دورۂ پاکستان میں پاکستانی حکومت کی دہشت گردی کے خاتمے کے لیئے کی گئی کوششوں کی تعریف کی تھی اور ایسا کچھ بھی نہیں کہا جو انہوں نے کابل میں کہا ہے۔