نطنز میں واقع ایرانی ایٹمی پلانٹ

واشنگٹن میں امریکی صدر جارج بش سے بات چیت کے بعد کوفی عنان نے کہا کہ انہیں امید ہے کہ ایران اس تنازعے کو ہوا نہیں دے گا۔

دریں اثناء ویانا میں ایٹمی امور سے متعلق اقوام متحدہ کے ادارے آئی اے ای اے کے سفارت کاروں نے بتایا ہے کہ ایران نے نطنز میں واقع اپنے ایٹمی پلانٹ میں یورینیم کی افزودگی شروع کردی ہے۔

سفارتکاروں نے بتایا کہ سائنسدانوں نے سینٹریفیوزیز میں یورینیم گیس داخل کرنا شروع کردیا ہے جو کہ ایٹمی ایندھن اور ایٹمی بم بنانے کی جانب پہلا قدم ہے۔

ایران نے پہلے سے وارننگ دی تھی کہ اگر اس معاملے کو اقوام متحدہ کی سکیورٹی کونسل میں لے جایا گیا تو وہ اپنے ایٹمی پروگرام پر پھر سے کام شروع کردے گا۔

گزشتہ ماہ ویانا میں آئی اے ای اے کی ایک میٹنگ میں رکن ممالک نے ایران کے ایٹمی معاملے کو سکورٹی کونسل کے سامنے پیش کرنے کے حق میں فیصلہ کیا تھا۔

ایران کا کہنا ہے کہ اس کا ایٹمی پروگرام پرامن مقاصد کے لیے ہے اور وہ صرف بجلی پیدا کرنا چاہتا ہے لیکن مغربی ممالک فکرمند ہیں کہ ایران کا ایٹمی منصوبہ ایٹمی بم بنانے کے لیے ہوسکتا ہے۔
ایران کے صدر احمدی نژاد نے حال ہی میں کہا تھا کہ اسرائیل کو صفحۂ ہستی سے ختم کردینا چاہیے یا اسے یورپ اور امریکہ میں لےجاکر بسانا چاہیے۔ ان کے اس بیان سے مغربی تشویش میں اضافہ ہوگیا ہے۔