ووٹنگ کےدوران سکیورٹی کے سخت انتطامات کیے گئے ہیں

لوگوں میں ان انتخابات کے متعلق کافی جوش و خروش پایا گیا اور شام ہونے تک سردی کے باوجود لوگ بڑی تعداد میں ووٹ ڈالنے کے لیے آتے رہے۔

انتخابات میں ٹرن آؤٹ کافی اچھا رہنے کی توقع ہے اور حکام کے مطابق یہ ساٹھ فیصد سے زیادہ ہو سکتا ہے۔ بہت سے فلسطینی اس بات پر خوش نظر آئے کہ چھ ماہ کی تاخیر کے بعد آخر کار انتخابات ہو رہے ہیں۔

انتخابات کی فضا پرامن رہی جبکہ حریف جماعتیں پولنگ سٹیشنوں کے باہر ووٹ مانگنے کا سلسلہ جاری رکھے ہوئے تھیں۔ تاہم ابھی نتائج آنے کا مرحلہ باقی ہے جس کے بعد اصل حالات کا پتہ چل سکے گا۔

اقوام متحدہ اور دیگر بین الاقوامی اداروں اور مبصرین نے بھی ان انتخابات کو پرامن قرار دیا ہے۔ ایک یورپی مبصر نے کہا ہے کہ غزہ اور مغربی کنارے میں ووٹنگ باقی عرب دنیا کے لیے ایک مثال ہے۔

غزہ اور مغربی کنارے میں ووٹنگ باقی عرب دنیا کے لیے ایک مثال ہے۔

	فلسطین میں دس سال بعد انتخابات ہوئے ہیں

فتح پارٹی کو مزاحمت پسند فلسطینی گروہ حماس کی جانب سے شدید مقابلے کا سامنا ہے۔ ان انتخابات میں حماس نے پہلی مرتبہ اپنے امیدوار کھڑے کیے ہیں۔

پولنگ کےدوران سکیورٹی کے سخت انتطامات کیے گئے۔ حماس کی طرف سے انتخابات میں حصہ لینے سے اسرائیل، امریکہ اور یورپ میں سخت تشویش پائی جاتی ہے جہاں اس پر شدت پسند تنظیم ہونے کے الزامات میں پابندی عائد ہے۔

فلسطینی رہنما محمود عباس نے لوگوں کو اپنا حقِ رائے دہی استعمال کرنے کی تلقین کرتے ہوئے سکیورٹی حکام سے کہا کہ وہ پولنگ کے درمیان امن قائم رکھنے کے لیے مستعد رہیں۔

رملہ اللہ میں موجود بی بی سی کے نامہ نگار کے مطابق بہت سےفلسطینیوں کا خیال ہے کہ فتح اسرائیل کے ساتھ امن کے قیام اور فلسطینی علاقوں کی اقتصادی حالت بہتر بنانے میں مکمل طور پر ناکام رہی ہے۔

فلسطینیوں کا خیال ہے فتح پارٹی نے اپنی نااہلی اور بدعنوانیوں کے باعث معیشت کو تباہ کر دیا۔

ہزاروں فلسطینیوں کو بیلٹ بکسوں کی حفاظت پر معمور کیا گیا جبکہ حریف شدت پسندوں نے ووٹنگ کے دوران امن قائم رکھنے کی یقین دہانی کروائی۔