اسرائیلی فوج کے ایف سولہ طیارے

اسرائیلی فوج کا کہنا ہے کہ اس کے طیاروں نے ایک مبینہ فلسطینی شدت پسند ٹھکانے کو نشانہ بنایا۔ ابتدائی اطلاعات میں کسی کے ہلاک ہونے کی خبر نہیں ہے۔

اسرائیلی طیاروں نے لبنان کے دارالحکومت بیروت کے جنوب میں جس ٹھکانے کو نشانہ بنایا اسے پاپولر فرنٹ فار دی لِبریشن آف فلسطین کا اڈہ بتایا گیا ہے۔

اسرائیلی فوج نے ایک بیان میں کہا: ’یہ کارروائی گزشتہ شب اسرائیلی آبادیوں پر داغے جانے والے راکٹوں کے جواب میں کی گئی ہے۔‘

منگل کی شام لبنان کی سرزمین سے داغے جانے والے کم سے کم چار راکٹ اسرائیل کے سرحدی شہروں میں جاگرے۔ تین راکٹ کریات شمونہ نامی شہر میں گرے جبکہ ایک راکٹ شلومی میں جاگرا۔

اسرائیلی فوج کے ذرائع نے ان راکٹوں کے لیے لبنان میں سرگرم تنظیم حزب اللہ کو ذمہ دار ٹھہرایا ہے تاہم حزب اللہ کی جانب سے اس بارے میں کچھ نہیں کہا گیا ہے۔

سن دوہزار میں لبنان سے اسرائیلی انخلاء کے بعد سے اسرائیل-لبنان سرحد پر اس طرح کے کئی حملے ہوئے ہیں۔

منگل کی شام جب اسرائیلی شہروں پر راکٹ داغے گئے تو شہر کے باشندوں کو حفاظتی مقامات میں منتقل کرنے کا حکم دیا گیا اور بجلی لگ بھگ آدھے گھنٹے کے لیے گل کردی گئی تھی۔

خبررساں ادارے اے ایف پی کے مطابق لبنانی پولیس نے بتایا ہے کہ لبنان کی سرزمین سے کم سے کم سات راکٹ داغے گئے تھے۔ پولیس کے مطابق دو مغربی سیکٹر اور پانچ مشرقی سیکٹر سے داغے گئے۔

حزب اللہ کے ایک ترجمان نے بتایا ہے کہ اسے ان حملوں کے بارے میں کچھ معلوم نہیں ہے جبکہ لبنان میں ’فتح‘ تحریک کے ایک اہلکار نے راکٹ حملوں میں فلسطینیوں کے ملوث ہونے سے انکار کیا ہے۔