اسرائیل کا کہنا ہے بمباری کا نشانہ بنانے والے سکول میں حماس کے لیےفنڈ جمع کیے جاتے تھے۔

غزہ شہر کے ایک سکول پر کیے گئے حملے میں کم از کم سترہ فلسطینی زخمی ہو گئے۔

اس سے پہلے غزہ شہر کے مشرقی حصے میں اسرائیل کی فوج کی جانب سے دو گاڑیوں پر کیے گئے ایک فضائی حملے میں چار فلسطینی ہلاک ہوگئے تھے۔

اسرائیل کی فوج کا کہنا ہے کہ یہ حملہ دوگاڑیوں پر کیا گیا جس میں ایک گاڑی پر اسلحہ جبکہ دوسری گاڑی میں حماس کے کارکن بیٹھے تھے۔

	فلسطینی شدت پسندوں نے راکٹ برسانے کا سلسلہ شروع کیا تھا

اسرائیل کا کہنا ہے کہ وہ جمعہ کے روز فلسطینی شدت پسند تنظیم حماس کی طرف سے اسرائیلی علاقوں پر راکٹ حملوں کا جواب دے رہا ہے۔

دوسری طرف حماس کا کہنا ہے کہ راکٹ حملے غزہ میں ہونے والے ان بم دھماکوں کا جواب ہیں جن میں 15 فلسطینی ہلاک ہو گئے تھے۔

اقوام متحدہ کے سیکریٹری جنرل کوفی عنان نے مشرق وسطیٰ میں تشدد کی نئی لہر پر تشویش کا اظہار کیا ہے۔