واحد الاقصوری کو خود ان کی اپنی ہی پارٹی نے چیلنج کر دیا ہے

مصر کی ایک عدالت نے صدارتی امیدوار واحد الاقصوری کو اس لیے انتخابات میں حصہ لینے سے روک دیا ہے کہ خود ان کی اپنی ہی پارٹی نے ان کی قیادت کو چیلنج کر دیا ہے۔

کہا جاتا ہے کہ یوں بھی مسٹر الاقصوری کے بارے میں یہ توقع نہیں کی جاری تھی کے وہ سات ستمبر کے انتخابات میں زیادہ لوگوں کے لیے پُر کشش ثابت ہو سکتے ہیں۔

صدر حسنی مبارک اگرچہ ان انتئابات میں پانچویں بار حصہ لے رہے ہیں لیکن خیال کیا جاتا ہے کہ کامیابی انہی کو حاصل ہو گی۔

ایک اور رولنگ میں عدالت نے یہ حکم بھی دیا ہے کہ مقامی غیر سرکاری تنظیمیں انتخابات کی مانیٹرنگ کر سکیں گی۔

اس کے علاوہ عالمی مبصرین کو بھی ان انتخابات کو دیکھنے کا موقع دیا جا رہا ہے۔

اب تک صدر کے عہدے کیلئے مصر میں صرف ایک ہی امیدوار حصہ لیتا تھا اور رائے دہندگان اس کے حق میں یا مخالفت میں اپنا ووٹ ڈال سکتے تھے لیکن ان انتخابات کے لیے مصر کے آئین میں ترمیم کی گئی ہے۔

بتایا گیا تھا کے اس نئی ترمیم کے بعد مصر میں حزب اختلاف کی پندرہ کے قریب سیاسی جماعتیں اپنے اپنے امیدوار صدارات کے عہدے کیلئے کھڑے کر سکیں گی۔ مگر مبصرین کا کہنا تھا کہ ترمیم کے باوجود امیدواروں کیلئے ایسی سخت شرائط بھی عائد کی جائیں گی جس کے نتیجے میں بہر حال ہر ایک کیلئے صدارتی انتخابات میں حصہ لینا ممکن نہیں ہو گا۔