دھماکوں سے تباہ ہونے والی عمارتوں کی مرمت کا کام شروع ہو گیا ہے

یہ گرفتاریاں مصری صدر حسنی مبارک کے اس اعلان کے بعد عمل میں آئیں جس میں انہوں نے اس عزم کا اظہار کیا تھا کہ وہ اپنے ملک سے دہشت گردی کا خاتمہ کر کے رہیں گے۔

صدر حسنی مبارک نے ان دھماکوں میں زخمی ہونے افراد کی عیادت بھی کی اور انہیں یقین دلایا کہ وہ ان دھماکوں کے ذمہ دار افراد کو سزا دلوا کر رہی رہیں گے۔

جائے حادثہ پر امدادی کارروائیاں جاری ہیں اور تباہ شدہ ہوٹلوں اور عمارتوں کی مرمت کا کام شروع کر دیا گیا ہے۔

دھماکوں کے بعد بہت سے سیاح علاقے سے فوراً چلے گئے جبکہ کچھ لوگوں کے وہیں رکنے کو ترجیح دی جبکہ اب مزید سیاحوں کی آمد بھی شروع ہوگئی ہے۔

ان دھماکوں کے نتیجے میں اٹھاسی افراد کے ہلاک ہونے کی تصدیق ہو چکی ہے جبکہ ایک سو سے زیادہ لوگ زخمی ہوئے ہیں۔ مرنے والوں کی اکثریت مصری ہے۔

یہ دھماکے بحیرہ احمر کے اس تفریحی مقام پر ہوئے تھےجو ملکی اور غیر ملکی سیاحوں میں یکساں مقبول ہے۔

دھماکوں کے ایک روز بعد بھی صورتحال واضح نہیں ہے۔اگرچہ دو مختلف گروہوں نے ان دھماکوں کی ذمہ داری قبول کی ہے مبصرین یہ سمجھنے سے قاصر ہیں کہ ان کا اصل ہدف کون تھا؟

مصر نے کہا ہے کہ فی الحال کسی کو ذمہ دار ٹھہرانا قبل از وقت ہوگا۔ ان دھماکوں کی عالمی سطح پر مذمت کی گئی ہے اور متاثرین سے اظہار ہمدردی کیا گیا ہے۔

اقوام متحدہ کے سیکرٹری جنرل کوفی عنان نے کہا ہے کہ عام شہریوں کے خلاف اس طرح کے تشدد کا کسی بھی مذہب یا عقیدے کے تحت جواز پیش نہیں کیا جا سکتا۔

شام نے کہا ہے کہ وہ ان حملوں کے ذمہ دار عناصر کی گرفتاری میں مصر کی ہر ممکن مدد کے لیے تیار ہے جبکہ امریکہ نے اعلان کیا ہے کہ وہ اس سلسلے میں مصر کو جو بھی مدد درکار ہو گی فراہم کرے گا۔