کچھ تجزیہ نگاروں کا خیال ہے کہ لیگ اہم فیصلے کرنے کی صلاحیت نہیں رکھتی۔

عرب رائے عامہ نے بہت عرصہ پہلے یہ سیکھ لیا ہے کہ عرب لیگ کے اجلاس ہمیشہ مایوس کن ہوتے ہیں۔ بہت سے موقعوں پر کانفرنس جھگڑوں کا شکار ہوئی جو عربوں کے درمیان نااتفاقی کی نشاندہی کرتی ہے۔

گزشتہ سال لیبیا کے رہنما معمر قدافی ابتدائی سیشن ہی میں وہاں پر موجود تمام شرکاء کو تنقید کا نشانہ بناتے ہوئے اجلاس سے نکل گئے۔اس سے قبل امریکہ کے عراق پر حملے سے دو ہفتے پہلے شرم الشیخ کے اجلاس میں بھی انہوں نے سعودی عرب کے رہنما شہزادہ عبداللہ کے ساتھ تلخ کلامی کی تھی۔

اس اجلاس میں بھی عرب رہنما بغداد کے لیے حمایتی بیانات کے علاوہ کچھ اور کرنے میں ناکام رہے۔ امریکہ پہلے ہی عراق پر حملہ کرنے لے لیے اس کے پڑوسی عرب ممالک کی سرزمین استعمال کرنے کے لیے انتظامات کر چکا تھا۔

عرب لیگ کے زیادہ تر اجلاس ایسی قراردادیں پاس کرنے کے بعد ختم ہوجاتے ہیں جنہیں عرب رہنما ہال سے باہر آکر بھول جاتے ہیں۔ عرب لیگ کے قانون کے مطابق کسی بھی قرارداد کی منظوری کے لیے تمام ارکان کی اتفاق رائے ضروری ہوتی ہے۔

چونکہ تمام ارکان اکثر مطمئن نہیں ہوتے اس لیے عربوں کے آپس کے جھگڑے حل نہیں ہو پاتے۔

عرب لیگ کی قرار دادوں کے متعلق کہا جاتا ہے کہ وہ بے معنی ہوتی ہیں

اس مسئلے کی ایجنڈے میں عدم شمولیت پر تنقید کرتے ہوئے مشہور سعودی کالم نگار عبدالرحمان الرشید نے لکھا کہ ’عرب لیگ کی عادت ہے کہ وہ مریض کا علاج اس کی موت کے بعد کرتی ہے۔‘

گو عرب لوگ اپنے رہنماؤں کی کمزوریوں سے بخوبی واقف ہیں انہوں نے ایک متحدہ عرب دنیا کے خواب دیکھنے نہیں چھوڑے۔

لیکن کچھ تجزیہ نگاروں کا کہنا ہے کہ لوگ عرب لیگ سے زیادہ توقعات وابستہ کیے ہوئے ہیں۔ الاحرام سنڑ فار پولیٹیکل اینڈ سٹریٹیجک سٹڈیز کے ڈائریکٹر عبدالمونیم سید کا کہنا ہے کہ ’ایسے لوگ جن کا خیال تھا کہ لیگ فلسطین کا مسئلہ حل کر لے گی یا عرب اتحاد میں کامیاب ہو جائے گی کچھ زیادہ ہی توقعات وابستہ کیے ہوئے ہیں۔لیگ ایک ایسا فورم بنانے میں کامیاب ہوئی ہے جہاں پر عرب ممالک اپنے خیالات کا اظہار کر سکتے ہیں اور دنیا کو آگاہ کر سکتے ہیں۔‘

لیکن یہ بات طے ہے کہ لیگ آپس کے جھگڑوں کی وجہ سے مقامی تنظیم کی حیثیت سے نہیں ابھر سکی۔