دھماکے ان دنوں ہوئے ہیں جب سیاحوں کی زیادہ تعداد مصر آ تی ہے

دھماکوں کے ایک روز بعد بھی صورتحال واضح نہیں ہے۔ کئی لوگوں کی شناخت نہیں ہو سکی۔ اگرچہ دو مختلف گروہوں نے ان دھماکوں کی ذمہ داری قبول کی ہے مبصرین یہ سمجھنے سے قاصر ہیں کہ ان کا اصل ہدف کون تھا؟

مصر نے کہا ہے کہ فی الحال کسی کو ذمہ دار ٹھہرانا قبل از وقت ہوگا۔

یہ دھماکے بحیرہ احمر کے اس تفریحی مقام پر ہوئے جو ملکی اور غیر ملکی سیاحوں میں یکساں مقبول ہے۔

دھماکوں کی عالمی سطح پر مذمت کی گئی ہے اور متاثرین سے اظہار ہمدردی کیا گیا ہے۔

اقوام متحدہ کے سیکرٹری جنرل کوفی عنان نے کہا ہے کہ عام شہریوں کے خلاف اس طرح کے تشدد کا کسی بھی مذہب یا عقیدے کے تحت جواز پیش نہیں کیا جا سکتا۔
مذمت کرنے والوں میں برطانیہ، روس، امریکہ، ایران، شام اور دوسرے ممالک شامل ہیں۔

شام نے کہا ہے کہ وہ ان حملوں کے ذمہ داروں کی گرفتاری میں مصر کی ہر طرح کی مدد کرنے کو تیار ہے۔

اس دوران صدر حسنی مبارک نے اس عزم کا اظہار کیا ہے کہ وہ اپنے ملک میں دہشت گردی کا خاتمہ کر کے رہیں گے۔

جب کے امریکہ نے اعلان کیا ہے کہ وہ اس سلسلے میں مصر کو جو بھی مدد درکار ہو گی فراہم کرے گا۔