مغوی گورنر راجا نواف الماہالامی کے اہل خانہ کا کہنا ہے کہ وہ شامی سرحد کے قریب کے فساد زدہ قصبے قائم سے صوبائی دارالحکومت آ رہے تھے جب انہیں مسلح افراد نے راستے سے اغوا کر لیا۔

بعد میں اغواکاروں نے ان کے رشتہ داروں سے رابطہ کرکے مطالبہ کیا کہ ان کی رہائی کے لیے قائم کے قصبے سے امریکی فوجوں کو نکلنا ہوگا۔

پچھلے چند مہینوں کے دوران اس علاقے میں مزاحمت کاروں اور امریکی فوج کے درمیان کئی جھڑپیں ہو چکی ہیں۔ امریکی باور کرتے ہیں کہ مزاحمت کار اسی جگہ سے عراق میں داخل ہوتے ہیں۔

امریکی فوج اس وقت نواحی صحرا میں مزاحمت کاروں کے خلاف ایک بڑی کارروائی میں مصروف ہے۔ اس کا دعوی ہے کہ پچھلے دو دنوں کے دوران اس نے ایک سو کے لگ بھگ مزاحمت کاروں کو ہلاک کیا ہے۔

اطلاعات کے مطابق انہیں توقع سے زیادہ مزاحمت کا سامنا کرنا پڑ رہا ہے۔ ادھر ابو مصعب الزرقاوی کے گروہ نے ان دعوؤں کی تردید کی ہے کہ ان کے بہت سے جنگجو مارے گئے ہیں۔

امریکہ مزاحمت کاروں کا راستہ بند کرنا چاہتا ہے لیکن عراق میں تشدد بدستور جاری ہے اور پچھلے گیارہ روز سے جاری تشدد کے سلسلے میں آج بغداد میں دو اور خودکش کار بم دھماکے ہوئے۔