عراق میں موجود امریکی فوج کا کہنا ہے کہ اس نے شام کی سرحد کے قریب مزاحمت کاروں کے خلاف کیے جانے والے آپریشن میں تقریباً پچھہتر افراد ہو ہلاک کر دیا ہے۔ امریکی فوجی بیان میں کہا گیا ہے کہ شامی سرحد کے قریب صوبہ الانبار کا یہ علاقہ سمگلنگ کے راستے اور غیرملکی جنگجوؤں کی پناہ گاہ کے طور پر استعمال کیا جاتا ہے۔ بیان میں یہ بھی بتایا گیا ہے کہ پچھہتر افراد کی ہلاکتیں آپریشن کے ابتدائی چوبیس گھنٹے میں واقع ہوئی۔ تاہم بیان میں آپریشن شروع کیے جانے کے وقت کے بارے میں کوئی تفصیل نہیں بتائی گئی اور نہ ہی یہ وضاحت کی گئی ہے کہ آیا کوئی امریکی فوجی ہلاک یا زخمی ہوا ہے یا نہیں۔ دریں اثناء عراقی حکام کا کہنا ہے کہ جنوبی بغداد میں ہونے والے خودکش کار بم حملے میں چار افراد ہلاک ہو گئے ہیں۔ اطلاعات کے مطابق خودکش حملہ آور نے بارود سے بھری اپنی گاڑی ایک چوک میں کھڑی پولیس کی گاڑیوں سے ٹکرا دی۔ بتایا گیا ہے کہ ہلاک ہونے والوں میں دو پولیس اہلکار اور دو عام شہری شامل ہیں۔ بغداد میں حالیہ ہفتوں کے دوران متعدد بم حملے کیے گئے جس کے نتیجے میں ہلاک ہونے والے درجنوں افراد میں سے بہت کا تعلق عراقی سکیورٹی فورسز سے تھا۔ | 
یہ صفحہ دوست کو ای میل کیجیئے
پرِنٹ کریں
