وہ اپنے اس دورے میں انڈونیشیا، سری لنکا اور مالدیپ کے متاثرہ علاقوں میں بھی جائیں گے

وائٹ ہاؤس نے بل کلنٹن اور جارج بش سینیئر سے درخواست کی تھی کہ وہ دسمبر میں آنے والے اس خدائی قہر سے متاثرہ افراد کی امداد کے لیے فنڈ جمع کریں۔

کلنٹن اور بس نے اپنے دورے کا آغاز تھائی لینڈ کے تفریحی مقام پھوکٹ کے شمال میں واقع ایک چھوٹے سےگاؤں بان نام کھیم سے کیا۔

بان نام کھیم گاؤں کی پانچ ہزار کی آبادی میں سے آدھے لوگ سونامی کا شکار ہو گئے تھے۔

اس گاؤں میں سابق امریکی صدور ان بچوں سے بھی ملے جن کے والدین اس سانحہ میں مارے گئے ہیں۔وہ اپنے اس دورے میں انڈونیشیا، سری لنکا اور مالدیپ کے متاثرہ علاقوں میں بھی جائیں گے۔

پھوکٹ آمد پر بل کلنٹن کا کہنا تھا کہ ’ ہماری آمد کا مقصد یہ دیکھنا ہے کہ کتنا کام کیا جا چکا ہے اور ہم اس سلسلے میں کیا کر سکتے ہیں، ساتھ ہی میں امدادی کارکنوں کا شکریہ بھی ادا کرنا چاہتا ہوں‘۔

اس موقع پر سینکڑوں افراد ساحل پر جمع ہوگئے اور انہوں نے بل کلنٹن اور جارج بش کو اپنی کشتیوں اور سازوسامان کی تباہی کی داستان سنائی۔

سابق امریکی صدور نے ان دو سو گھروں کا بھی معائنہ کیا جو کہ متاثرین کے لیے تیار کیے گئے ہیں۔

بل کلنٹن اور جارج بش پھوکٹ میں سونامی میں مرنے والے افراد کی یاد میں تعمیر کی جانے والی ایک یادگار کا سنگِ بنیاد بھی رکھیں گے۔یہ دونوں صدور تھائی لینڈ کے وزیرِاعظم تھاسکن شناوترا سے بھی ملاقات کریں گے۔

بل کلنٹن اور بش اتوار کو سونامی سے سب سے زیادہ متاثرہ علاقے آچے جائیں گے۔

دریں اثناء سویڈن کے بادشاہ کارل XVI اور ملکہ سلویا نے بھی جمعہ کو تھائی لینڈ کے تباہ شدہ ساحلی علاقے کا دورہ کیا۔ انہوں نے سویڈن کے باشندوں کی مدد کرے پر مقامی افراد کا شکریہ ادا کیا۔