محمود عباس غزہ جا کر شدت پسندوں سے بات کرنا چاہتے ہیں

گزشتہ روز اپنے عہدے کا حلف اٹھاتے ہوئے محمود عباس نے تشدد کے سلسلے کو روکنے کی اپیل کی تھی لیکن ان کی صدارت کے آغاز پر غزہ کی پٹی میں اسرائیلی فوج کے ہاتھوں سات فلسطینیوں کی ہلاکت سایہ فگن رہی جبکہ فلسطینیوں کی جانب سے اسرائیل کے اندر ایک راکٹ داغے جانے سے ایک اسرائیلی عورت بھی زخمی ہوئی۔

یاسر عرفات کے جانشین کے طور پر انتخابات میں بھاری اکثریت سے محمود عباس کی جیت سے مساعئی امن کے دوبارہ شروع ہونے کی امید بندھی تھی لیکن جمعرات کے روز ایک حملے میں چھ اسرائیلی فوجیوں کی ہلاکت کے بعد اسرائیل نے محمود عباس سے تمام رابطے معطل کردیے ہیں۔

اس سے قبل حالیہ انتخابات میں کامیابی کے بعد غرب اردن کے شہر رملہ میں ایک تقریب کے دوران محمود عباس نے فلسطینی انتظامیہ کے صدر کی حیثیت سے حلف اٹھایا۔

حلف اٹھانے کے بعد محمود عباس نے فلسطینی گروہوں اور اسرائیلی فورسز دونوں کی جانب سے ہونے والے تشدد کی مذمت کی اور اسرائیل کے ساتھ فائربندی کی ضرورت پر زور دیا ہے۔

حلف برداری سے ایک دن قبل اسرائیلی وزیراعظم شیرون نے فلسطینیوں کے ساتھ اس وقت تک تمام رابطے منقطع کرنے کا حکم دیا جب تک محمود عباس شدت پسندوں کے خلاف کارروائی نہیں کرتے۔

ایریل شیرون نے یہ فیصلہ جمعرات کی شب غزہ میں ایک چیک پوائنٹ پر فلسطینی شدت پسندوں کے حملے میں چھ اسرائیلی فوجیوں کی ہلاکت کے بعد کیا۔

بعض فلسطینی گروہوں نے وزیراعظم شیرون کے فیصلے پر غصے کا اظہار کیا ہے اور یہ کہا ہے کہ اسرائیلی محمود عباس کو حالات بہتر کرنے کا موقع نہیں دینا چاہتے۔

محمود عباس عرف ابو ماذن کو ایک اعتدال پسند رہنما سمجھا جاتا ہے۔ وہ گزشتہ اتوار کے روز منعقد ہونے والے صدارتی انتخابات میں کامیاب ہوئے تھے۔ انہوں نے مذاکرات کے ذریعے فلسطینی شدت پسندوں کو قابو میں کرنے کی بات کی ہے۔

انتخابات میں کامیابی کے بعد اسرائیلی وزیراعظم ایریئل شیرون نے محمود عباس کو فون کرکے مبارکباد دی تھی اور ’جلد ہی‘ ملاقات کی بات کہی تھی۔ دو روز قبل تک فلسطینیوں اور اسرائیلیوں کے درمیان پیش رفت کے امکان کا اظہار کیا جارہا تھا۔