محمود عباس اپنی فتح پر خوشی کا اظہار کر رہے ہیں

انہوں نے کہا کہ ’ہم امن کے لیے تیار ہیں، امن جو عدل پر مبنی ہو۔ ہم امید کرتے ہیں کہ ان (اسرائیل) کا ردِعمل مثبت ہو گا‘۔

صدر بش نے محمود عباس کو واشنگٹن آنے کی دعوت دی ہے۔ یہ ایک ایسی پیشکش ہے جو کہ انہوں نے مرحوم رہنما یاسر عرفات کو کبھی بھی نہیں کی تھی۔

صدر بش نے فلسطینی صدر کو کہا کہ وہ آزاد اور جمہوری فلسطین کے قیام اور سکیورٹی، دہشت گردی اور اقتصادی ترقی کے لیے ان کی مدد کرنے کے لیے تیار ہیں۔

صدر بش نے اسرائیل سے بھی کہا کہ وہ ان علاقوں کو خالی کرے جن کو خالی کرنے کا اس نے وعدہ کیا ہے۔

محمود عباس نے بھاری اکثریت سے فلسطین کے نئے صدر منتخب ہونے کے بعد اپنے حامیوں سے خطاب کرتے ہوئے کہا تھا کہ ان کی کامیابی ’یاسر عرفات کی روح‘ اور تمام فلسطینیوں کے لیے ہے۔

فلسطینی جشن منا رہے ہیں

محمود عباس کے واحد نمایاں حریف انسانی حقوق اور جمہوریت کے سرگرم کارکن مصطفیٰ برعوثی نے اپنی شکست کا اعتراف کرتے ہوئے کہا تھا کہ ’میں انتہائی خوشی اور فخر محسوس کر رہا ہوں۔ ہم نے ان انتخابات سے ساری دنیا پر ثابت کر دیا ہے کہ ہم جمہوریت قائم کرنے کے اہل ہیں۔ ہم نے بہت اچھے نتائج حاصل کیے ہیں اور اب ہم فلسطین کی دوسری اور حماس سے بھی بڑی طاقت ہیں۔‘

عسکریت کی حامی حماس اور اسلامی جہاد نے ان انتخابات کا بائیکاٹ کیا تھا لیکن الیکشن کمیشن کا کہنا ہے کہ اس بائیکاٹ اور اسرائیلی رکاوٹوں کے باوجود چھیاسٹھ فیصد ووٹروں نے حقِ رائے دہی استعمال کیا۔

حماس کے ایک ترجمان محمود ظہر نے بی بی سی کو بتایا کہ نئے صدر کامیاب نہیں ہوں گے کیونکہ اسرائیل انہیں موقعہ ہی نہیں دے گا۔ تاہم انہوں نے کہا ہے کہ انتخابات کے بائیکاٹ کے باوجود وہ محمود عباس کے ساتھ کام کریں گے۔