ووٹروں کو کئی کئی گھنٹے قطار میں کھڑا رہنا پڑا

انتخابی اعتبار سے تین اہم ریاستوں فلوریڈا، اوہائیو اور پینسلوینیا میں لوگوں کی لمبی قطاریں دیکھتے ہوئے مقررہ وقت کے بعد بھی ووٹ ڈالنے کی اجازت دی گئی۔

اوہایو میں ڈیموکریٹک پارٹی نے عدالت سے انتخابی عمل کو جلد مقرر کرانے کے لیے ایک درخواست منظور کروائی تھی۔ ریپبلکن نے اپیل دائرکی ہے۔

فلوریڈا میں بھی قانونی جنگ شروع ہونے کا امکان ہے۔ وہاں ریپبلکن پارٹی نے پانچ لاکھ کے قریب ڈاک کے ذریعے ڈالے گئے ووٹوں کی گنتی جمعرات تک مؤخر کرانے کے لیے درخواست دائر کی ہے۔

جی ایم ٹی کے مطابق نصف شب سے ووٹنگ مشرقی ریاستوں سے بند ہونی شروع ہوگی اور جی ایم ٹی کے مطابق صبح چھ بجے تک امریکہ کے مغربی ساحل پر واقع ریاستوں میں ختم ہوگی۔

سیاسی مبصرین کا کہنا ہے کہ ووٹنگ اتنے بڑے پیمانے پر ہوئی ہے کہ وہ ساٹھ فیصد تک ٹرن آؤٹ کی امید کررہے ہیں۔ صدر جارج بش اور سینیٹر جان کیری کے درمیان مقابلہ اتنا سخت ہے کہ رائے شمارے کے جائزے اکٹھا کرنے والے ادارے کچھ کہنے سے گریز کررہے ہیں۔

اطلاعات میں کہا گیا ہے کہ فیصلہ کن سمجھی جانے والی ریاست اوہائیو میں ایک پولنگ سٹیشن پر ووٹروں کو اپنا حق رائے دہی استعمال کرنے کے لئے چھ گھنٹے تک انتظار کرنا پڑا۔ امید کی جارہی ہے کہ جیسے ہی ووٹنگ ختم ہوگی رائے شماری کے ادارے اپنے جائزے پیش کرنے کی کوشش کریں گے۔

امریکی تاریخ میں یہ انتخاب کتنا اہم ہے اس بات کا اندازہ اس سے بھی لگایا جاسکتا ہے کہ دونوں امیدواروں نے ووٹنگ کے دن بھی انتخابی ریلیوں میں حصہ لیا اور ڈیموکریٹ امیدوار سینیٹر جان کیری نے بھی منگل کی صبح ایک اور فیصلہ کن ریاست ونسکانسن کا دورہ کیا جس کے بعد وہ اپنی آبائی ریاست میساچیوسٹ میں بوسٹن پہنچے جہاں کوپلی پلازہ کے مقام پر وہ اپنے نائب کے ساتھ اپنی فتح کی صورت میں ایک جلسے سے خطاب کرنے والے ہیں۔

ہمارے نامہ نگار مظہر زیدی کا کہنا ہے کہ بوسٹن کی پبلک لائبریری کے باہر کوپلی پلازہ کے سامنے ایک چھوٹے سے میدان میں جان کیری کے حامیوں نے فتح کی صورت میں ممکنہ جشن کی تیاریاں مکمل کرلی ہیں اور مشہور گلوکار بروس سپرنگسٹین آج رات یہاں بوسٹن میں ڈیموکریٹ حامیوں کے سامنے اپنے فن کا مظاہرہ بھی کررہے ہیں۔

جیسے جیسے الیکشن کے نتائج سامنے آئیں گے ویسے ہی ان دونوں امیدواروں کے بیس کیمپوں پر جوش میں اضافہ ہوگا۔

شمال مشرق میں کئی ریاستوں میں موسم شدید خراب ہونے کی وجہ سے ووٹنگ کے متاثر ہونے کا اندیشہ ہے لیکن باقی تمام ملک میں حالات معمول کے مطابق ہیں۔

فیصلہ کن ریاستوں میں سے ایک ریاست اوہائیو میں پولنگ سٹیشنوں میں امیدواروں کے نمائندوں کی موجودگی پر جو تنازعہ پچھلے کئی روز سے چل رہا تھا اس پر منگل کی صبح ریاست کی عدالت نے رپبلکن پارٹی کی حمایت میں فیصلہ سناتے ہوئے یہ کہا کہ یہ نمائندے وہاں موجود رہ سکتے ہیں۔

ڈیموکریٹک پارٹی کا کہنا تھا کہ اس طرح کی موجودگی کی الیکشن قوانین میں کوئی گنجائش نہیں ہے۔

سیاسی مبصرین کا کہنا ہے کہ ہوسکتا ہے کہ ان انتخابات کا فیصلہ چند اہم ریاستوں میں ہی ہوجائے۔ جو ریاستیں فیصلہ کن کردار ادا کرسکتی ہیں ان میں فلوریڈا، پینسلونیا اور اوہائیو سرفہرست ہیں۔