پولینڈ کی فوج دو صوبوں سے دستبردار

تازہ ترین اطلاعات کے مطابق نجف میں امریکی فوج اور مقتدی الصدر کی ملیشیا میں بدترین لڑائی جاری ہے۔

بغداد کے علاقے صدر شہر میں عراقی عبوری حکومت نے سولہ گھنٹے کا کرفیو نافذ کر دیا ہے۔ اسی دوران بصرہ میں برطانوی فوج اور مقتدی الصدر کے حامیوں میں جھڑپوں میں ایک برطانوی فوجی ہلاک ہو گیا ہے۔

پولینڈ کی فوج کی طرف سے جاری کردہ ایک بیان میں کہا گیا ہے کہ نجف اور قدیسیہ صوبوں کا کنٹرول واپس امریکی فوج کے حوالے کیا جا رہا ہے۔

اس بیان میں مزید کہا گیا کہ امریکی جنرل جارج کیسے نے ان صوبوں کا کنٹرول واپس امریکی فوج کے حوالے کرنے کو کہا تھا۔

انہوں نے ایک پریس کانفرنس سے خطاب کرتے ہوئے کہا کہ وہ عراق سے نہیں جائیں گے۔ انہوں نے کہا کہ وہ اپنے خون کے آخری قطرے تک نجف کے مقدس شہر کا دفاع کریں گے۔

مقتدی الصدر نے بات چیت کرنے سے انکار کردیا۔ انہوں کہا کہ نجف اشرف پر بم گرائے جا رہے ہیں وہ ایسی صورت حال میں امریکی فوج سے بات چیت نہیں کریں گے۔

انہوں نے کہا کہ قبضہ اور امن ساتھ ساتھ نہیں چل سکتے اور نہ ہی لڑائی اور مذاکرات ساتھ ساتھ ہو سکتے ہیں۔

نجف میں مسلسل پانچ روز سے امریکی فوج اور عراقی شیعہ رہنما مقتدی الصدر کی حامی فوج میں زبردست لڑائی ہو رہی ہے۔

مقتدی الصدر نے عراقی حکومت کی طرف سےنجف سے نکل جانے کا مطالبہ مسترد کر دیا تھا۔

دریں اثناء جنوبی عراق میں تیل نکالنے کا کام معطل کر دیا گیا ہے۔

ساوتھ آئل کمپنی کے ایک اعلی اہلکار نے امریکی خبر رساں ادارے کو بتایا کہ عراق کے جنوب میں بصرہ کے قریب واقع تیل کے کنوؤں سے تیل نکالنے کا کام مقتدی الصدر کی حامی ملیشیا کی طرف سے دی جانے والی دھمکیوں کے بعد بند کر دیا گیا ہے۔

عراق کے تیل کی وزارت کے ایک ترجمان نے ان اطلاعات کی تصدیق کرنے سے انکار کر دیا۔ تاہم انہوں نے کہا کہ تیل کی تنصیبات پر حملے سے صرف اور صرف عراقی مفادات کو نقصان پہنچے گا۔

عراق کی نوے فیصد تیل کی برآمدات تقریباً بیس لاکھ بیرل یومیہ تیل کی ترسیل بصرہ کے علاقے سے کی جاتی ہے۔

ماہرین کا خیال ہے کہ اس علاقے میں تیل کی تنصیبات کے بند کیے جانے سے عراق کی تعمیر نو کا کام بری طرح متاثر ہو گا۔