 |  فلسطینی وزیراعظم نے امن و امان بحال کرنے کے لیے ناکافی اختیارات کو مستعفی ہونے کا جواز قرار دیا تھا |
فلسطینی مقننہ کے ارکان نے یاسر عرفات سے اصرار کیا ہے کہ وہ وزیراعظم احمد قریع کا استعفیٰ منظور کر لیں۔ فلسطینی وزیراعظم نے امن و امان بحال کرنے کے لیے اختیارات کے ناکافی ہونے کو مستعفی ہونے کا جواز قرار دیا تھا۔ اب فلسطینی مقننہ نے ایک قرارداد منظور کی ہے جس میں کہا گیا ہے کہ کابینہ امن و امان کی صورتِ حال کو بہتر بنانے میں ناکام ہو گئی ہے۔ فلسطینی سربراہ یاسر عرفات نے غزہ میں شدت پسندوں کے مظاہروں کے بعد احمد قریع کا استعفیٰ منظور کرنے سے انکار کر دیا تھا۔ اس کے بعد غربِ اردن میں پیش آنے والے ایک تازہ ترین واقعہ میں بدھ کے روز ایک مسلح شخص نے نابلس میں ایک مقامی اہلکار کو اغوا کر لیا ہے۔ فلسطینی اسمبلی کا اجلاس بدھ کو ہوا جس میں اس کمیٹی کی قرارداد پر بحث کی گئی جسے تشدد اور اغوا کے واقعات کے بعد حالات کا جائزہ لینے اور رپورٹ پیش کرنے کے لیے غزہ بھیجا گیا تھا۔ ارکان اسمبلی نے تینتالیس کے مقابلے میں چار ووٹ سے کمیٹی تمام سفارشات کی توثیق کر دی۔ ان سفارشات میں کہا گیا تھا کہ مسٹر احمد قریع کی حکومت تحلیل کی جائے اور اس کی جگہ ایک نئی قابینہ تشکیل دی جائے۔ کمیٹی کی رپورٹ میں کہا گیا ہے کہ مسٹر قریع کی حکومت امن و امان بحالی کے لیے اپنی ذمہ داری ادا کرنے اور لوگوں کو تحفظ فراہم کرنے میں مکمل طور پر ناکام رہی ہے۔ | 
یہ صفحہ دوست کو ای میل کیجیئے
پرِنٹ کریں
