اب نیٹو افواج کی تعداد دس ہزار ہو جائے گی

اس سے پہلے یہ تعداد ساڑھے چھ ہزار فوجیوں پر مشتمل تھی تاہم اب اس میں اضافہ اس لیے کیا جا رہا ہے کہ فوج انتخابات میں سلامتی اور تحفظ کے امور میں افغان انتظامیہ کی مدد کرسکے۔

نیٹو افواج میں یہ اضافہ توقع سے زیادہ ہے لیکن ابھی یہ واضح نہیں ہے کہ کون سا ملک کتنے فوجی فراہم کرے گا۔

نامہ نگاروں کا کہنا ہے کہ نیٹو ممالک کو افغانستان میں ووٹروں کے رجسٹریشن کے کام میں مدد دینے کے لیے مطلوب فوجیوں کی تعداد پوری کرنے میں دشواریوں کا سامنا تھا۔

افغانستان میں انتخابات کے حوالے سے پُر تشدد واقعات میں اضافہ ہو رہا ہے اتوار کو افغان صوبہ ہلمند میں آٹھ افراد کو ہلاک کر دیا گیا تھا اور زابل میں اتحادی افواج نے پانچ مشتبہ طالبان کو ہلاک اور چار کو گرفتار کر لیا تھا۔

یہ واقعہ زابل کے صورے ڈسٹرکٹ میں ایک مسجد سے امریکی فوجیوں پر کی جانے والی فائرنگ کے بعد پیش آیا۔

بتایا گیا ہے کہ امریکی فوجیوں نے فضائی بمباری کے بعد علاقے کا محاصرہ شروع کر دیا ہے۔