ایجنسی کے سربراہ انتونیو ماریا کوسٹا افغانستان کے مغربی اور شمالی علاقوں میں صورتحال کے جائزے کے بعد ملک کے دارالحکومت کابل جا رہے ہیں۔ کوسٹا نے منشیات کے اس غیر قانونی کاروبار کا بغور تجزیہ کیا جو یورپ میں پائی جانے والی نوّے فیصد ہیروئین کا ذمہ دار ہے۔

وہ پہلے ہی کہہ چکے ہیں کہ افغانستان میں منشیات کے مسئلے پر قابو نہ پانے کی صورت میں ملک کو خطرناک مستقبل کا سامنا کرنا پڑ سکتا ہے۔

اقوام متحدہ کی ایجنسی کے سربراہ نے اپنے دورے کے دوران مقامی کمانڈروں، پولیس کے سربراہوں اور دیگر رہنماؤں سے ملاقاتیں کیں۔

ان ملاقاتوں کے نتائج زیادہ حوصلہ افزا نہیں۔ کرپشن وسیع پیمانے پر پھیلی ہوئی ہے۔ پولیس کے سربراہوں کا کہنا ہے کہ ان کے مقابلے میں منشیات کے سمگلر زیادہ طاقتور ہیں۔

کسان حکومت کی پالیسی کے بارے میں واضح نہیں۔ یہ ابہام زیادہ حیران کن نہیں کیونکہ بعض مذہبی رہنما لوگوں کو یہ بتانے کا اعتراف کرتے ہیں کہ پوست کاشت کرنے میں اس وقت تک کوئی حرج نہیں اگر وہ خود اسے استعمال نہ کریں۔

سوال یہ پیدا ہوتا ہے کہ صدر حامد کرزئی اس کے بارے میں کیا کر سکتے ہیں؟ کچھ لوگوں کا خیال ہے کہ کرزئی حکومت اس سال ستمبر میں انتخابات سے پہلے اس موضوع کے بارے میں زیادہ سخت اقدامات نہیں کرے گی۔ لیکن ایسی صورت میں یہ مسئلہ زیادہ شدت اختیار کر سکتا ہے۔